ხულოს გამგებლის მოადგილის, ლაშა ბოლქვაძის ინფორმაციით მთა შავნაბადაზე ხანძრის არეალი გაფართოვდა და დაკვამლიანებაც მოიმატა. „დაკვამლიანება გაიზარდა, ხანძარი სამ ლოკაციაზე, დაახლოებით 3 ჰექტარზეა გავრცელებული. შეიძლება ითქვას, რომ ხანძრის არეალი გაიზარდა, რასაც ხელს ძლიერი ქარი უწყობს, სახანძრო სამუშაოებში მოსახლეობაც აქტიურად ჩაერთო“ – აცხადებს ლაშა ბოლქვაძე სატელეფონო საუბარში.
ჩაერთობა თუ არა ხანძრის სალიკვიდაციო სამუშაოებში ავიაცია, ლაშა ბოლქვაძის ინფორმაციით დეტალები ზუსტდება „საგანგებო სიტუაციების მართვის სამსახურსა და შსს დეტალურ ინფორმაცის ვაწვდით, უახლოეს პერიოდში გადაწყდება ჩაერთობა თუ არა სალიკვიდაციო სამუშაოებში ვერტმფრენები“.
სამაშველო სამსახურის პრესსამსახურში კი „ბათუმელებს“ განუცხადეს რომ ამ ეტაპზე ხანძრის ლიკვიდაციის პროცესში ავიაციის ჩართვის საკითხი გადაწყვეტილი არ არის.
ხულოს მუნიციპალიტეტის ღორჯომის თემში, მთა შავნაბადაზე ხანძარის შესახებ ინფორმაცია გუშინ, 3 სექტემბერს გავრცელდა. ხანძრის კერასთან ყველაზე ახლოს მდებარე დასახლებული პუნქტი სოფელი მეკეიძეებია.
ხულოს გარდა, ხანძრების ლოკალიზებაზე მეხანძრეები ამ დრომდე მუშაობენ თელავსა და თუშეთში. ცეცხლის სალიკვიდაციო სამუშაოები გრძელდება ყვარელშიც.
