ბათუმის სამრეწველო ზონაში, სადაც სხვადასხვა კომპანია სამშენებლო მასალებს აწარმოებს, ადგილობრივებმა გზა გადაკეტეს. რამდენიმე მოქალაქემ აგურის მწარმოებელი საწარმოდან გამოსული სატვირთო მანქანა რამდენიმე საათით გააჩერეს. ამ დროისთვის გზა, რომლითაც დაახლოებით 40 ოჯახი და საწარმოები სარგებლობენ, გახსნილია.
“შეგვეცოდა მანქანის მძღოლი, დიდი გზა მაქვს გასავლელიო. ორი თუ სამი საათი გავაჩერეთ, რადგან ყურადღებას ისე არავინ გვაქცევს,”- უთხრა “ბათუმელებს” იამზე მჟავანაძემ. ის შანიძის პირველ ჩიხში ცხოვრობს.
იამზე მჟავანაძის თქმით, სამშენებლო მასალების წარმოება ყოველგვარი ნორმების გარეშე მიმდინარეობს, საწარმოს არ აქვს სპეციალური ფილტრი, ასევე ზიანდება გზა მძიმეწონიანი მანქანების სისტემატური მოძრაობისგან.
“მტვრის ბუღში ვართ გახვეული. ამ მანქანამაც ცემენტი დაყარა და ერთმანეთს საერთოდ ვეღარ ვხედავდით, ცემენტია ყველგან… გზა ისედაც ნურიგელის ტბასავითაა და შეუძლებელია გავლა. მივმართეთ კომპანიას და მერიას, მაგრამ არავინ გვეხმარება. ისევ გადავკეტავთ გზას, თუ უყურადღებოდ დაგვტოვებენ,”- ამბობს იამზე მჟავანაძე.
მოსახლეობის თქმით, სამშენებლო მასალებს კომპანია “გუმბათი” აწარმოებს, თუმცა “გუმბათი ჯგუფში” გვითხრეს, რომ საწარმო შანიძის ჩიხში მათ არ ეკუთვნით.
მოსახლეობის თქმით, ადგილზე რომელიმე კომპანიის წარმომადგენელი ან პოლიცია არ მისულა.
