ხელვაჩაურში, სოფელ კირნათში მდებარე ჰესის „აჭარა ენერჯი 2007“-ის შესასვლელი მოსახლეობამ გადაკეტა. მოთხოვნა დაპირებული კომპენსაციის მიღებაა. ამ დროისთვის საპროტესტო აქცია უკვე დაიშალა. შეკრებილები აცხადებენ, რომ ეს გამაფრთხილებელი იყო და პირველ მაისს მთელი დღით მოაწყობენ პიკეტირებას, თუკი მათ მოთხოვნას ჰესის მშენებელეი კომპანია არ გაითვალისწინებს.
„დილის 8 საათიდან გადავკეტეთ შესასვლელი. 7 თვის წინ უნდა გარკვეულიყო კომპენსაციის საკითხი და ისევ არ გველაპარაკება კომპანია. პოლიცია ადგილზე არ მოსულა, რა უნდა ეთქვათ, რომ მოსულიყვნენ? ჩვენი სურვილით დავიშალეთ და ისევ მოვალთ, თუ არ მოგვისმენენ,“ – ამბობს ზვიად ჯიხაძე. მისი თქმით, კომპენსაციის საკითხი კირნათისა და აჭარისწყლის თემებში დაახლოებით 210 ოჯახს ეხება.
