ბულგარეთის სანაპიროსთან საზღვაო დრონები კონტეინერმზიდ გემს დაესხნენ თავს.
ამის შესახებ ბულგარეთის თავდაცვის მინისტრმა, დიმიტარ სტოიანოვმა განაცხადა. მისი თქმით, სატვირთო გემს ქალაქ შაბლადან სამხრეთ-აღმოსავლეთით, დაახლოებით 21 მილის დაშორებით, სამი საზღვაო დრონი დაესხა თავს.
ბერძნული კომპანია Contships Management-ის საკუთრებაში არსებული, ლიბერიის დროშის ქვეშ მცურავი გემი ისრაელის ჰაიფას პორტიდან რუმინეთში, კონსტანტასკენ მიდიოდა.
ბულგარული მედიის ცნობით, გემის დასახმარებლად ტანკერი გაგზავნეს. ეკიპაჟის ევაკუაცია სამაშველო ტივებით განხორციელდა. რეგიონში მყოფმა მეთევზეებმა განაცხადეს, რომ გემზე ხანძარი იყო და მარჯვენა მხარეs სერიოზული დაზიანებები ჰქონდა.
ეკიპაჟი ევაკუირებულია. 18-მა მეზღვაურმა დატოვა გემი. გემის მფლობელი კომპანიის განცხადებით, ეკიპაჟის ყველა წევრი უსაფრთხოდაა.
ეს არის მეხუთე თავდასხმა დრონებით სატვირთო გემებზე შავ ზღვაში, ბულგარეთის ექსკლუზიურ ეკონომიკურ ზონაში.
ოფიციალურად არ სახელდება, რომელი ქვეყნის დრონები ესხმის თავს გემებს ბულგარეთის სანაპიროსთან, თუმცა წინა შემთხვევებში ბულგარეთის მთავრობამ განაცხადა, რომ მის ტერიტორიულ წყლებში დრონებით თავდასხმის უკან, სავარაუდოდ, რუსეთი დგას.
ბულგარეთის მთავრობაში ამ საკითხის განსახილველად რუსეთის ელჩიც დაიბარეს.
ამავე თემაზე:
რა ხდება შავ ზღვაში, სადაც დრონები სატვირთო გემებს ესხმიან თავს – „რუსეთი ტესტავს ნატოს“






