რა პირობებში და რა ფასად ყიდულობენ ქონებას ბათუმში „ოცნების“ დამფინანსებელი ბიზნესმენები – კვლევა

აჭარაში „ოცნების“ მთავრობის თავმჯდომარის, ზურაბ პატარაძის მეგობრის, ბიზნესმენ ედნარ პაპუნაიშვილის კომპანიამ, შპს „ოპუს სიგნიჩარმა“ 2026 წლის 23 აპრილს, უკონკურენტოდ, მინიმალური 10 750 და 38 850 ლარიანი ფასნამატებით, 367 950 და 1 მილიონ 333 550 ლარად მოიგო 238 და 863 კვ.მ ფართობის მიწის ნაკვეთები, რომლებიც მდებარეობს ბათუმის ცენტრში, გრიბოედოვის ქუჩა #62-ში და ივანე ჯავახიშვილის ქუჩის #31-ში.

აქ კომპანია ერთი კვარტლის ჩანაცვლებას გეგმავს – გრიბოედოვის ქუჩიდან კომახიძის ქუჩამდე 1,4 განაშენიანებული ჰექტრის ჩანაცვლების პროექტი [განაშენიანების დეტალური გეგმა – გდგ] ბათუმის საკრებულომ დაამტკიცა. პროექტი იმდენად მასშტაბურია, რომ მისი დასრულების შემდეგ ის უბანს მნიშვნელოვნად შეცვლის. მიუხედავად ამისა, დოკუმენტი ისე დაამტკიცეს, რომ ის საჯარო გაცნობისთვის არ გამოუქვეყნებიათ.

მონიშნულია სამშენებლო ტერიტორია

პროექტის რენდერი – განაშენიანების დეტალური გეგმიდან

ბათუმში ერთი კვარტლის ჩანაცვლებას გეგმავენ – რატომ დამალა საკრებულომ პროექტი დამტკიცებამდე

გარდა ამისა, „საერთაშორისო გამჭვირვალობა საქართველო“ წერდა, რომ ედნარ პაპუნაიშვილის მეორე კომპანიამ, შპს „ხიდი 2006”-მა,  2025 წლის 25 აგვისტოს, ასევე უკონკურენტოდ, 136 300 ლარად მოიგო უპირობო ელექტრონული  აუქციონი, რომელზეც გაიყიდა კურორტ გოდერძიზე მდებარე 383 კვადრატული მეტრი მიწის ნაკვეთი.

„საერთაშორისო გამჭვირვალობა – საქართველომ“ შეისწავლა, 2025 წლის 1 იანვრიდან დღემდე, ქალაქ ბათუმის მუნიციპალიტეტის მერიის მიერ მოწყობილი ელექტრონული აუქციონები, რომლის მიზანი ბათუმის მუნიციპალიტეტის უძრავი ქონების პრივატიზაცია იყო.

ამ პერიოდში მერიამ სულ 118 ელექტრონული აუქციონი გამოაცხადა. მათგან 60 აუქციონი არ გაიმართა მონაწილეების არარსებობის გამო. შესაბამისად, ამ აუქციონებზე გასაყიდად გამოტანილი ქონება ვერ გაიყიდა. 1 აუქციონი ბათუმის მერიამ შეწყვიტა და 2,5 თვეში, უცვლელი პირობებით ისევ გამოცხადდა აუქციონი და ის შპს „პონტუს გონიომ“ უკონკურენტოდ მოიგო.

57 შემდგარი აუქციონიდან, სადაც გამარჯვებულები გამოვლინდნენ, 52 იყო უკონკურენტო და მასზე გამოტანილი უძრავი ქონება გაიყიდა საწყის საპრივატიზებო ღირებულებაზე მინიმალური ფასნამატით, ერთ ბიჯში.

ორმოცდაჩვიდმეტივე აუქციონის შედეგად გასხვისდა 8 954 კვ.მეტრი ფართობის 57 მიწის  ნაკვეთი.

ამ მიწის ნაკვეთების საწყისი საპრივატიზაციო ღირებულება 10 მილიონ 192 110 ლარი იყო, რაც აუქციონებზე ვაჭრობის შედეგად გაიზარდა 484 286 ლარით და  საბოლოოდ, ბათუმის ბიუჯეტმა მიიღო 10 მილიონ 676 396 ლარი. კონკურენტულ გარემოში მიმდინარე აუქციონებზე გატანილი ქონებები საპრივატიზაციო ფასთან შედარებით ერთნახევარჯერ მეტ ფასად გაიყიდა, ხოლო უკონკურენტო აუქციონებზე გამოტანილი ქონებები – მინიმალური ფასნამატებით.

ორგანიზაციის კვლევის თანახმად, ბათუმის მერია, აჭარის მთავრობის მსგავსად, მუნიციპალურ ქონებას უკონკურენტოდ ასხვისებს. ამ აუქციონებში გამარჯვებული რვა კომპანიის დირექტორებმა, მოქმედმა და ყოფილმა მფლობელებმა „ქართულ ოცნებას“ სხვადასხვა დროს ჯამში 1 მილიონ 536 000 ლარი შესწირეს. აუქციონებში გამარჯვებულმა კომპანიებმა სახელმწიფო შესყიდვებიდან 4 მილიონ ლარამდე მიიღეს.

კვლევის თანახმად, აუქციონში უკონკურენტოდ გამარჯვებულმა იაშა შერვაშიძის ოჯახის წევრებმა და ბიზნესპარტნიორებმა, „ქართულ ოცნებას“ და მის მხარდაჭერილ საპრეზიდენტო კანდიდატს, სალომე ზურაბიშვილს 345 000 ლარის შესწირეს.

საქართველოს პარლამენტის ყოფილი წევრი „ოცნებიდან“ იაშა შერვაშიძე და მისი ოჯახი ბათუმში, ჟიული შარტავასა და ასლან აბაშიძის ქუჩების კვეთაში, ცენტრალურ სტადიონთან ახლოს, ჰექტრობით ფართობს ფლობენ და მრავალფუნქციური კომპლექსის მშენებლობას გეგმავენ.

იაშა შერვაშიძე საქართველოს VII – VIII  მოწვევის პარლამენტში „ერთიანი ნაციონალური მოძრაობის“ მაჟორიტარული სიით შევიდა. ის ქედის მაჟორიტარი იყო. ხელისუფლებაში „ოცნების“ მოსვლის შემდეგ ისიც „ოცნებაში“ გადავიდა. იაშა შერვაშიძეს პარლამენტში მუშაობის დროს თავი არც კანონპროექტებზე მუშაობით და არც სიტყვით გამოსვლით არ გამოუჩენია.

მონიშნულია საპროექტო ტერიტორია

იაშა შერვაშიძე ყოფილ პრემიერთან ერთად ქედაში

ბათუმის სტადიონთან მინიმუმ 4 თაუერის აშენებას გეგმავენ – პარლამენტიდან ბიზნესში

უკონკურენტო აუქციონში კიდევ ერთი გამარჯვებულის, ბექა თვალაძის ბიზნესპარტნიორმა, შპს „ფორის დეველოპმენტში“ და შპს „ფორის დეველოპმენტ 2-ში“, ბექა მანველიძემ 65 000 ლარი შესწირა „ქართულ ოცნებას“. ბექა მანველიძე, აჭარაში „ოცნების“ ფინანსთა და ეკონომიკის მინისტრის მოადგილის, გიორგი მანველიძის ძმაა. მანამდე, 2020-2024 წლებში, გიორგი მანველიძე აჭარის უმაღლესი საბჭოს ფრაქცია „ქართული ოცნებას“ ხელმძღვანელობდა.

გიორგი და ბექა მანველიძეების მამა, ბაგრატ მანველიძე, 2014-2017 წლებში იყო ბათუმის მუნიციპალიტეტის ვიცე-მერი, ხოლო შემდგომ – აჭარის განათლების, კულტურის და სპორტის მინისტრის მოადგილე. 2019 წლის 30 მაისს, ბაგრატ მანველიძე, სხვა მაღალჩინოსნებთან ერთად, სამსახურებრივი მდგომარეობის გამოყენებით დიდი ოდენობით სახელმწიფოს კუთვნილი მართლსაწინააღმდეგო გაფლანგვისა და სამსახურებრივი უფლებამოსილების ბოროტად გამოყენების ფაქტზე დააკავეს.

აუქციონში უკონკურენტოდ გამარჯვებულმა კომპანია შპს „სოლიდმა“, სახელმწიფო შესყიდვებიდან, დაფუძნებიდან დღემდე, ჯამში მიიღო 3 მილიონ 861 398 ლარის შემოსავალი. მათ შორის, უკონკურენტოდ მოიგო 1 მილიონ 107 024 ლარის ჯამური ღირებულების 82 ელექტრონული ტენდერი.

საყურადღებოა ელექტრონულ აუქციონებში უკონკურენტოდ გამარჯვებული ერთი კომპანიის დაფუძნების/რეგისტრაციის თარიღი: შპს „ქონექთ პროპერთი ჯორჯია“ დაფუძნდა 2025 წლის 24 იანვარს, აუქციონის გამოცხადებამდე 6 დღით ადრე.