იაპონიის აღმოსავლეთ სანაპიროს ტაიფუნი „დუჟუანი“ უახლოვდება. ხელისუფლება ტოკიოსა და მიმდებარე ტერიტორიებზე მცხოვრებ მოსახლეობას წყალდიდობისა და მეწყრის მაღალი რისკის შესახებ აფრთხილებს.
დაახლოებით ორ მილიონ ადამიანს ევაკუაციის რეკომენდაცია მიეცა. იაპონიის შინაგან საქმეთა სამინისტროს ცნობით, ევაკუაცია ექვს პრეფექტურაში 1,908,645 ადამიანს ეხება. ეს პრეფექტურებია: იბარაკი, ჩიბა, ტოკიო, კანაგავა, შიზუოკა და საიტამა.
ევაკუაცია სავალდებულო არ არის, მაგრამ იაპონიის მეტეოროლოგიურმა სააგენტომ (JMA) ზოგიერთ რაიონში მოსახლეობა სიცოცხლისთვის დაუყოვნებლივი საფრთხის შესახებ გააფრთხილა.
„გთხოვთ, შეამოწმოთ თქვენი მუნიციპალიტეტის კატასტროფების რისკის დონე და ევაკუაცია მოახდინოთ, სანამ ადგილობრივი ხელისუფლება ოფიციალური ევაკუაციის ბრძანებას გასცემს“, – ციტირებს „ბიბისი“ იაპონიის მეტეოროლოგიური სააგანტოს მთავარ სინოპტიკოსს, რომელმაც ასევე აღნიშნა, რომ ტაიფუნი მოსალოდნელზე ძლიერი იყო.
მედიის ცნობით, წყალდიდობის შედეგად რამდენიმე ადამიანი უკვე დაშავდა, ერთი ქალი დინებამ წაიღო და მიმდინარეობს სამაშველო სამუშაოები.
პროგნოზის მიხედვით, ტაიფუნი 24 საათს გასტანს. გამოცხადებულია მეოთხე და უმაღლესი – მეხუთე დონის გაფრთხილება.
_____________
ფოტო: ევროპის პრესფოტო სააგენტო/EPA/FRANCK ROBICHON
