„საერთაშორისო გამჭვირვალობა – საქართველოს“ ინფორმაციით, 2026 წლის იანვარ-აგვისტოში „ქართული ოცნების“ პარტიულ სალაროში ჩარიცხული 5 812 000 ლარიდან 2 403 000 ლარი (41%) აჭარის წილია.
„ბოლო პერიოდის არასაარჩევნო წლებს შორის ეს ყველაზე მაღალი მაჩვენებელია: 2023 წლის ანალოგიურ პერიოდში შემოწირულებების ჯამი 2 მილიონ ლარამდე იყო, 2024 წელს – 2,1 მილიონი, 2025 წელს კი – 4,000,000 ლარამდე. 2025 წელს „ქართულმა ოცნებამ“ თვითმმართველობის არჩევნები ჩაატარა“ – წერს „გამჭვირვალობა“.
ორგანიზაციის ინფორმაციით, საკვლევ პერიოდში „ქართული ოცნების“ 63 შემწირველიდან 55 ფიზიკური პირი ერთ ან რამდენიმე კომპანიასთან არის დაკავშირებული.
„გამჭვირვალობა-საქართველოს“ ინფორმაციით, ამ კომპანიებმა სახელმწიფო შესყიდვებში ტენდერებისა და გამარტივებული შესყიდვების გზით მიიღეს 870 მილიონი ლარი, შემწირველ კომპანიებზე კი 3 მილიონი კვადრატული მეტრი ფართობის მშენებლობის ნებართვა გაიცა, ძირითადად, ბათუმსა და ქობულეთში.
„2026 წლის იანვარ-აგვისტოში განხორციელებული შემოწირულებების შესწავლისას გამოიკვეთა კოორდინირებული დონაციის ტენდენცია.
ამის მაგალითად შეგვიძლია განვიხილოთ 2026 წლის 26 მარტის შემთხვევა, როდესაც 8 ფიზიკურმა პირმა „ქართული ოცნების” ანგარიშზე დიდი თანხები გადარიცხა.
23-24 აპრილს შპს „ნოვას“ მეწილეებმა 278,000 ლარი შეწირეს „ქართულ ოცნებას“. იგივე მოხდა 23 მარტს, 13 და 25 მაისსაც, როცა 4-4-მა ფიზიკურმა პირმა ივანიშვილის პარტიისთვის ასეულობით ათასი ლარი გაიღო“.
ჯამში ამგვარი სინქრონული გადარიცხვების შედეგად „ქართულმა ოცნებამ” 1,278,064 ლარი მიიღო.
„წელსაც თვალშისაცემია მსხვილი სამშენებლო, სამედიცინო, სავაჭრო და თანამდებობის პირებთან დაკავშირებული კომპანიების მეწილეების შემოწირულებების ტენდენცია:
შპს „ნოვას” მეწილეებმა: ზვიად აბულაძემ, ჯემალ ბოლქვაძემ, ემზარ ირემაძემ, ჯემალ ანთაძე და რამაზ ირემაძემ საკვლევ პერიოდში „ქართულ ოცნებას” 278,000 ათასი ლარი გადაურიცხეს. მათ ჯამში მმართველ პარტიას 1,120,000 ლარი შესწირეს.
კომპანიამ 2011 წლიდან დღემდე სახელმწიფო შესყიდვებიდან 15 მილიონ ლარზე მეტი მიიღო, საიდანაც 5 მილიონ ლარზე მეტი – გამარტივებული წესით გაფორმებული პირდაპირი ხელშეკრულებებით.
„ალიანს ჯგუფში” შემავალი კომპანიების („ალიანსი”, „ალიანს ფრივილიჯი” „ალიანსი ქობულეთი”, „ალიანს ლისი” მფლობელებმა და დირექტორებმა ბესიკ ჟღენტმა, დავით ბალაძემ, თემურ და ლანა ბიწაძეებმა და ნიკოლოზ თევზაძემ 2026 წლის 23-დან 30 მარტამდე პერიოდში პარტიას 225,000 ლარი შესწირეს, სულ კი მათ „ქართული ოცნებისთვის” 1,350,000 ლარი გაიღეს.
სანაცვლოდ კი ამ სამშენებლო ჯგუფმა ბათუმში, თბილისში, ქობულეთში, კურორტ გოდერძზე 2,000,000 კვადრატული მეტრის საცხოვრებელი და მულტიფუნქციური კომპლექსების მშენებლობის ნებართვა მიიღო.“-წერს „გამჭვირვალობა-საქართველო“.
შემოწირულობები სამედიცინო ბიზნესიდან
„გამჭვირვალობა-საქართველოს“ კვლევის მიხედვით, „ხოზრევანიძეების კლინიკის” მეწილეებმა ირაკლი და ელდარ ხოზრევანიძეებმა 105,000 ლარი შესწირეს მმართველ პარტიას. ასევე, „საოჯახო მედიცინის რეგიონული ცენტრის“ მფლობელმა, მუხამედ ართმელაძემ, „მედდას” 70% მფლობელმა, მანანა ტუნაძემ და შპს „ქელს ქეარ გრუპის” 50% მფლობელმა. ეკა ზოიძემ – 125,000 ლარი შესწირეს.
„ჯამში, სამედიცინო დაწესებულებების მფლობელებმა „ქართულ ოცნებას“ 2021-2026 წლებში 415,000 ლარი გადაურიცხეს“-წერია კვლევაში.
„ამ დაწესებულებებმა სახელმწიფო, რეგიონული და მუნიციპალური შესყიდვებიდან 7 000 000-ზე მეტი ლარი მიიღეს, მათ შორის 3 მილიონამდე ლარი პირდაპირი კონტრაქტებით.
საქართველოს არალეგიტიმურ პარლამენტში ქობულეთის დელეგატად არჩეულმა ბიზნესმენმა გიორგი ჭყონიამ და მასთან დაკავშირებულმა პირებმა ჯემალ ჭყონიამ, მალხაზ დუმბაძემ და არჩილ ბასილაძემ პარტიის სალაროში 120,000 ლარი გადარიცხეს.
ჯამში, ჭყონიას ჯგუფს „ქართული ოცნებისთვის“ 1,5 მილიონ ლარზე მეტი აქვს გადარიცხული, ბოლო 14 წელიწადში სახელმწიფო შესყიდვებიდან მიღებული შემოსავალი კი 500,000,000 ლარზე მეტია.
ხელვაჩაურის სასამართლოს თავმჯდომარის, გოჩა ფუტკარაძის ბიზნესმენი შვილის, კობა ფუტკარაძის ბიზნესპარტნიორებმა, ჯუმბერ და ჯიმშერ ზოიძეებმა 75,000 ლარი გაიღეს „ქართული ოცნების“ სასარგებლოდ, ჯამში, სამივე პირს ივანიშვილის პარტიისთვის 430,000 ლარი აქვს გადარიცხული.
მათთან დაკავშირებულმა კომპანიებმა ბათუმში 130,000 კვადრატულ მეტრამდე საცხოვრებელი და მრავალფუნქციური მაღალსართულიანი სახლების მშენებლობის ნებართვები მიიღეს“- წერს „გამჭვირვალობა-საქართველო“.
ამავე წყაროს ცნობით, საკვლევ პერიოდში სამშენებლო ჯგუფ „ნექსთის” მეწილეებმა კობა დევაძემ და ვახტანგ გედენიძემ „ქართულ ოცნებას“ 70 000 ლარი შესწირეს.
სულ, 360 000 ლარი გაიღეს ბიძინა ივანიშვილის პარტიისთვის.
ჯგუფში შედის შპს „ნექსთ აპარტამენტები”, სს „ნექსთ ჰოლდინგი”, შპს „ნექსთ გრინი”, შპს „ნექსთ ენდერს”, შპს „ნექსთ თაუნი” და კიდევ რამდენიმე სხვა კომპანია. მათ ასეულობით ათასი კვადრატული მეტრის საცხოვრებელი და მრავალფუნქციური კორპუსების მშენებლობების ნებართვები მიიღეს.
ბათუმის საკრებულოს წევრმა, ლევან დოლიძემ მმართველ პარტიას 60,000 ლარი შესწირა. ლევან დოლიძის მამასთან, ნუკრი დოლიძესთან და ბიძასთან, მერაბ დოლიძესთან დაკავშირებულმა კომპანიებმა „ბონდი 2009”-მა და „მონოლითი 2005“-მა მმართველმა პარტიას ჯამში 600,000 ლარზე მეტი მისცა. ორივე კომპანია ლიდერობს ბათუმის ყველაზე მსხვილი მხარჯავი მუნიციპალური ორგანიზაციის – „საქალაქო ინფრასტრუქტურისა და კეთილმოწყობის სამმართველოს“, ასევე, აჭარის გზების დეპარტამენტის შესყიდვებში:
ორივეს მიერ მიღებული შემოსავალი 2013-2026 წლებში, ჯამურად, 336,000,000 ლარს აჭარბებს. დოლიძეების საკუთრებაშია ბათუმში, შარტავას გამზირზე მდებარე სამშენებლო პროექტიც. სულ დოლიძეების საკუთრებაში არსებულმა კომპანიებმა 65,000 კვადრატული მეტრი კომერციული და საცხოვრებელი ფართების მშენებლობის ნებართვა მიიღეს.
შემომწირველთა შორისაა ლაშა ბალაძე, მსხვილი სამშენებლო ჯგუფ „გუმბათის” მფლობელი. საკვლევ პერიოდში მან „ქართულ ოცნებას“ 50,000 ლარი გადაურიცხა, სულ კი 2023-2026 წლებში – 290,000 ლარი გაიღო. ბალაძის ბიზნესპარტნიორი კომპანიებში „მონოპოლი გრუფი”, „გუმბათი რეზიდენსი“, „ბულვარ ფოინთი“ აჭარის ავტონომიური რესპუბლიკის ყოფილი თავმჯდომარე და საქართველოს პარლამენტის ყოფილი წევრი, არჩილ ხაბაძეა. იგი შპს „ბულვარ ფოინთის“ დირექტორიცაა.
„გუმბათი ჯგუფმა”, 2014 წლიდან დღემდე, სახელმწიფო შესყიდვებიდან 10 მილიონ ლარზე მეტი მიიღო, საიდანაც 9 მილიონი ლარი პირდაპირი შესყიდვის წილია“-წერს გამჭვირვალობა-საქართველო.
ორგანიზაციის შეფასებით, ეს კვლევა ადასტურებს, რომ „ქართული ოცნება” მსხვილ ბიზნესმენებთან ჩართულია სახელმწიფოს მიტაცების იმგვარ მოდელში, სადაც მოქმედებს პრინციპი Quid pro Quo – „მომეცი, რომ მოგცე“.
„შემომწირველებს შორის არიან როგორც სახელმწიფო ტენდერებში გამარჯვებული კომპანიების მფლობელი თანამდებობის პირები, ასევე, მსხვილი სამშენებლო კომპანიების მეწილეები, რომელთაც ათეულობით ახალი საცხოვრებელი კორპუსების მშენებლობის ნებართვა აქვთ აღებული ბათუმის ტერიტორიაზე.
შემომწირველებს შორის არიან ბათუმში მოქმედი სამედიცინო დაწესებულებების მფლობელები და ხელმძღვანელები“ – წერს „გამჭვირვალობა“.
