ბათუმის საქალაქო სასამართლომ ბათუმში, 25 ივნისს, სასტუმრო „ლონდონთან“ კაცის დაჭრაში ბრალდებულსა და კიდევ ერთ პირს წინასწარი პატიმრობა შეუფარდა.
საუბარია 25 ივნისს, ძველ ბათუმში მომხდარ შემთხვევაზე, როცა ცეცხლსასროლი იარაღით ერთი პირი დაჭრეს.
შსს-ს ინფორმაციით, დაკავებულა თურქეთის ორი მოქალაქე: 2004 წელს დაბადებული ა.ა. და 2001 წელს დაბადებული ბ.ი.
„გამოძიებით დადგინდა, რომ ა.ა.-მ, მიმდინარე წლის 25 ივნისს, ბათუმში, ასევე, თურქეთის რესპუბლიკის მოქალაქე – 2000 წელს დაბადებული ე.ა. ცეცხლსასროლი იარაღიდან გასროლით დაჭრა და შემთხვევის ადგილიდან მიიმალა. დაჭრილი მამაკაცი საავადმყოფოში გადაიყვანეს, სადაც შესაბამისი სამედიცინო დახმარება ჩაუტარდა.
გამოძიებით, ასევე, დადგინდა, რომ დანაშაულს შეესწრო ა.ა.-ს თანმხლები პირი , ამჟამად ბრალდებულის სახით დაკავებული ბ.ი., თუმცა მან მომხდარის შესახებ სამართალდამცველებს არ შეატყობინა“ – წერს შსს.
ბრალდებულები 28 ივნისს დააკავეს.
ერთ პირს ბრალდება საქართველოს სისხლის სამართლის კოდექსის 19, 109-ე მუხლის „ბ“ ქვეპუნქტით (განზრახ მკვლელობის მცდელობა ისეთი საშუალებით, რომელიც განზრახ უქმნის საფრთხეს სხვათა სიცოცხლეს და ჯანმრთელობას) და 236-ე მუხლის მე-3 და მე-4 ნაწილებით (ცეცხლსასროლი იარაღის და საბრძოლო მასალის მართლსაწინააღმდეგო შეძენა, შენახვა და ტარება) წარედგინა, რაც სასჯელის სახედ და ზომად 16-დან 20 წლამდე თავისუფლების აღკვეთას ითვალისწინებს.
მეორე პირს ბრალდება 376-ე მუხლის მე-2 ნაწილით (განსაკურებით მძიმე დანაშაულის შეუტყობინებლობა) წარედგინა, რაც სასჯელის სახედ და ზომად 3-დან 7 წლამდე თავისუფლების აღკვეთას ითვალისწინებს.
პროკურატურის შუამდგომლობის საფუძველზე ბათუმის საქალაქო სასამართლომ ორივე ბრალდებულს აღკვეთი ღონისძიების სახით პატიმრობა შეუფარდა.
________________
ფოტოზე: 25 ივნისი, შემთხვევის ადგილი. ფოტო: „ბათუმელები“
