21 ივნისს, ბათუმში ევროპის დღე აღინიშნება, ევროკავშირსა და ქართველ ხალხს შორის ხანგრძლივი პარტნიორობისა და თანამშრომლობის ნიშნად.
ევროპის დღის აღსანიშნავად დაგეგმილი ღონისძიებები სასტუმრო „შერატონში“ გაიმართება 13:00-17:00 საათამდე.
რა დახვდება ღონისძიებაზე მისულ სტუმარს
- EU პროექტების სივრცეში ნახავთ ინფორმაციას, თუ როგორ უწყობს ხელს ევროკავშირი საქართველოში ცხოვრების გაუმჯობესებას მთელი საქართველოს მასშტაბით, განათლებიდან მდგრად განვითარებამდე, დასაქმებიდან – თანასწორობამდე.
- თამაშში „წიგნების თარო“ – შესაძლებლობა გექნებათ შეუერთდეთ ახალგაზრდებს და აღმოაჩინოთ ევროკავშირის ისტორია და ლიტერატურა საინტერესო და სახალისო გზით.
- დაგეგმილია აუდიოვიზუალური გამოფენა „ეს ქვეყანა შენია“, სადაც შეგიძლიათ გაიგოთ მეტი ქართული ტრადიციების, ევროპული ღირებულებებისა და სამოქალაქო საზოგადოების როლის შესახებ.
- ევროპის დღის მარკეტზე შეგიძლიათ დააგემოვნოთ ადგილობრივი პროდუქცია და დაათვალიეროთ უნიკალური ხელნაკეთი ნივთები, რომლებიც შექმნილია ევროკავშირის ბენეფიციარების მიერ.
შესაძლებლობა გექნებათ დაესწროთ ქართველი ფოტოგრაფის, ნათელა გრიგალაშვილის მასტერკლასს – „თვალით დანახული ისტორია – ვიზუალური ამბის თხრობა”.
ასევე, შეძლებთ დაესწროთ აჭარული ტრადიციული ქარგვის ვორქშოპს, ოსტატ მზევინარ ირემაძესთან ერთად ან გემთმშენებლობის კრეატიულ ვორქშოპს და ააწყოთ თქვენი გემის მოდელი და დაათვალიეროთ გემების მოდელების გამოფენა „აფრა”.
თუ გაინტერესებთ როგორ იქმნება ელექტრონული მუსიკა, შეუერთდით საბა აზნარაშვილის ვორქშოპს „შენ ქმნი მუსიკას“.
15:00 საათზე კი ევროპის დღესთან დაკავშირებით ბათუმში ველომსვლელობა გაიმართება.
ველომსვლელობის შეკრების ადგილი ბათუმის სახელმწიფო უნივერსიტეტია [შადრევნების მხრიდან]. მათთვის, ვისაც ველოსიპედი არ ჰყავს, პირველი 30 მსურველი ველოსიპედით სარგებლობას უსასყიდლოდ შეძლებს.
ველოსიპედის მსურველებმა თან უნდა იქონიოთ პირადობის დამადასტურებელი მოწმობა. მოწმობის გარეშე ველოსიპედი არ გაიცემა.
ევროპის დღეები ბათუმში 18:00 საათზე ბათუმის ჩოგბურთის კლუბში ცოცხალი მუსიკით დასრულდება, ჯგუფების – Killages და Mechanical Rainbow-ს კონცერტით.
ყველა ღონისძიებაზე დასწრება თავისუფალია.
ასევე ხვალ, 21 ივნისს, სასტუმრო „ინტურისტში“ გაიხსნება სამოქალაქო საზოგადოების ფორუმი „პორტო ფრანკო“, რომელზეც ისაუბრებენ ისტორიკოსი, ილიას უნივერსიტეტის ასოცირებული პროფესორი ბექა კობახიძე, ეკონომიკის კვლევის პოლიტიკური ცენტრის უფროსი მკვლევარი ზაზა შენგელია და საერთაშორისო ურთიერთობების ექსპერტი გიგი გიგიაძე. შეხვედრის მოდერატორი ციალა ქათამიძეა.
ფორუმი 14:00 საათზე დაიწყება.
