აშშ-ის პრეზიდენტმა დონალდ ტრამპმა უკმაყოფილება გამოთქვა რუსეთის მიერ უკრაინის წინააღმდეგ წარმოებულ ომში არსებული ვითარების გამო, კერძოდ, უკრაინის ქალაქებზე რუსულ სარაკეტო თავდასხმებზე.
ამის შესახებ მან ისრაელის პრემიერ-მინისტრ ბენიამინ ნეთანიაჰუსთან ოვალურ კაბინეტში შეხვედრისას განაცხადა 7 აპრილს.
ტრამპმა თქვა, რომ არ იცის „რა ხდება იქ, მაგრამ ძალიან ცუდი სიტუაციაა“.
„არ მომწონს ის, რაც ხდება დაბომბვასთან დაკავშირებით, რადგან ისინი [რუსები] ახლა გიჟებივით ბომბავენ“, – განაცხადა აშშ-ის პრეზიდენტმა.
მან დასძინა, რომ შეერთებული შტატები მოლაპარაკებებს აწარმოებს როგორც რუსეთთან, ასევე უკრაინასთან პოტენციური მშვიდობიანი მოგვარების შესახებ.
„ჩვენ ვხვდებით რუსეთს, ჩვენ ვხვდებით უკრაინას და თითქოს ვუახლოვდებით [რეგულირებას], მაგრამ არ ვარ ბედნიერი ამ დაბომბვებით, რაც ხდება დაახლოებით ბოლო კვირის განმავლობაში. ეს საშინელი, საშინელი რამ არის“ – თქვა ტრამპმა.
