დღეს, 20 იანვარს, ახალგაზრდა იურისტთა ასოციაციის ხელმძღვანელმა, ნონა ქურდოვანიძემ ბრიფინგზე განაცხადა, რომ „ბათუმელებისა“ და „ნეტგაზეთის“ დამფუძნებელი, მზია ამაღლობელი დაკავების შემდეგ შიმშილობს. მან თქვა, რომ მზია ამაღლობელი საკვებს არ იღებს, იღებს მხოლოდ წყალს და ეს მისი პროტესტის ფორმაა.
ბრიფინგზე ისაუბრა „ბათუმელების” მთავარმა რედაქტორმა, ეთერ თურაძემაც.
„მე არ მახსოვს, რომ საქართველოში გვყოლოდეს ქალი პოლიტპატიმარი, შეიძლება მეშლება, მაგრამ არ ვიცი, რაც ვნახე და რაც ჩემს ცნობიერებაში არის, ვიცი, რომ ეს არის პირველი ქალი პოლიტპატიმარი, ეს არის პირველი ქალი ჟურნალისტი, პირველი ქალი მედიამენეჯერი, რომელიც სისტემამ გაანეიტრალა, რომელსაც სისტემამ გამოუცხადა სასტიკი ბრძოლა.
არავითარი დასაბუთება და საჭიროება იმის, რომ მზია ამაღლობლისთვის შეეფარდებინათ აღკვეთი ღონისძიების სახით პატიმრობა, არ არსებობდა. არა მხოლოდ, ვთქვათ, ადამიანურად და ჰუმანური მოსაზრებებით, არამედ არც სამართლებრივად, მაგრამ სისტემა, რომელიც არის რეპრესიული, რომელიც ებრძვის ყველაფერ ნათელს, არ ითვალისწინებს არც ჰუმანიზმს და რასაკვირველია, არც სამართალს.
სადაც არ არის სამართლიანობა, იქ არ არის არც მშვიდობა და არც კეთილდღეობა, შესაბამისად ჩვენ, ყველა, ამ ქვეყნის მოქალაქეები, პირველ რიგში, რა თქმა უნდა, ჟურნალისტები, ვიქნებით ამ სისტემის სამიზნეები, დარწმუნებული ვარ.
ეს არის ალბათ მხოლოდ დასაწყისი იმ დიდი ბრძოლის, რასაც ჰქვია რუსული მმართველობის სტილი, რასაც ჰქვია რუსული დევნა ჟურნალისტების. ვიცით ჩვენ, გვინახავს, ვადევნებდით თვალს რუსეთში როგორ მიდიოდა მედიების განადგურება, ჩვენ ვართ ამ საფრთხის წინაშე როგორც ჩანს, ამ რისკების წინაშე, ამიტომ გვმართებს უფრო მეტად მობილიზება და უფრო მეტი ხმაური თუ უფრო მეტი აქტივიზმი.
ჩვენ გამოგვიცხადეს ბრძოლა, ჩვენ [„ბათუმელებსა“ და „ნეტგაზეთს“ ვგულისხმობ] პრინციპში დავრჩით მთავარი ფიგურის გარეშე, ჩვენთვის ძალიან რთული იქნება ამ საქმიანობის გაგრძელება გარწმუნებთ, ძალიან რთული იქნება ადამიანებს იმ სახით მივაწოდოთ ინფორმაცია, რა სახითაც ვაწვდიდით, ანუ საზოგადოების ინფორმირება ობიექტური, გადამოწმებული და ა.შ. ინფორმაციით, როგორც ჩვენი შიდა ეთიკა და რეგულაციები გვავალდებულებს, ეს ყველაფერი იქნება ძალიან რთული, მაგრამ ჩვენ უნდა ვცადოთ, გავაგრძელოთ ეს ბრძოლა.
ასევე მინდა გთხოვოთ მხარდაჭერა, როგორც თქვენ, ისე საზოგადოებას, ადამიანებს, ვისთვისაც მნიშვნელოვანია ამ ქვეყნის დემოკრატიული განვითარება, რომ არ გავჩერდეთ და არ მივცეთ სისტემას იმის შესაძლებლობა, რომ ეს ქვეყანა საბოლოოდ შედგეს როგორც ავტორიტარული, დიქტატორული სახელმწიფო“ – განაცხადა ბრიფინგზე ეთერ თურაძემ, „ბათუმელების“ მთავარმა რედაქტორმა.
- რა ხდება?
„ნეტგაზეთისა“ და „ბათუმელების“ დამფუძნებელი და დირექტორი, მზია ამაღლობელი 11 -12 იანვრის ღამეს ორჯერ დააკავეს. პირველად საპროტესტო შინაარსის პლაკატის გაკვრის გამო, რომელზეც ეწერა „იფიცება საქართველო”, მეორედ – ბათუმის პოლიციის უფროს ირაკლი დგებუაძისთვის სილის გაწვნის გამო პოლიციელზე თავდასხმის ბრალდებით, რაც 4-დან 7 წლამდე პატიმრობას ითვალისწინებს.
ინციდენტს წინ უძღოდა დაპირისპირება და ჭყლეტა მონაწილეებსა და პოლიციას შორის, რაც პოლიციის მხრიდან პროვოკაციული ქმედებებს მოჰყვა.
14 იანვარს ბათუმის საქალაქო სასამართლომ მზია ამაღლობელს აღკვეთის ღონისძიების სახით პატიმრობა შეუფარდა. გადაწყვეტილება მოსამართლე ნინო სახელაშვილმა გამოაცხადა. მან დააკმაყოფილა პროკურატურის შუამდგომლობა აღკვეთის ღონისძიების სახით პატიმრობის გამოყენებაზე.
ამავე თემაზე:
მზია ამაღლობლის ბრალდება ატარებს დაშინებისა და პოლიტიკური რეპრესიის სახეს – საია
