იპოთეკით დაზარალებულები დღეს, 9 აგვისტოს, საქართველოს საკონსტიტუციო სასამართლოსთან, საკონსტიტუციო სასამართლოს თავმჯდომარესთან შეხვედრის მოთხოვნით შეიკრიბნენ. მათი სურვილია უშუალოდ გიორგი პაპუაშვილისგან მოისმინონ პასუხი კითხვაზე, რატომ მიიღო სასამართლომ წარმოებაში სარჩელი, რომლის დაკმაყოფილების შემთხვევაში, ოჯახების გამოსახლების უფლება ისევ პოლიციას ექნება.
„სარჩელის ავტორი რამდენიმე არასამთავრობო ორგანიზაციაა, რომლებიც იპოთეკარების ანუ გამსესხებლების ინტერესებს იცავენ. მათ სურთ გაუქმდეს პარლამენტის მიერ 2013 წელს მიღებული გადაწყვეტილება, რომლითაც შინაგან საქმეთა მინისტრის 2007 წლის ბრძანება გაუქმდა. პარლამენტის გადაწყვეტილების შემდეგ, ადამიანის გამოსახლება მხოლოდ სასამართლოს გადაწყვეტილებითაა შესაძლებელი,“ – უთხრა „ბათუმელებს“ თამაზ ბაკურიძემ, არასამთავრობო ორგანიზაცია „ჩვენი უფლებებისთვის“ ხელმძღვანელმა.
საკონსტიტუციო სასამართლოს თავმჯდომარე დღეს ოპეთეკით დაზარალებულებს არ შეხვდა. სასამართლოს პრესსამსახურის განმარტებით, მოსამართლე არ ხვდება მხარეებს, ხოლო სარჩელი, რასაც დაზარალებულები აპროტესტებენ, ჯერ-ჯერობით მხოლოდ დარეგისტრირებულია და მისი დასაშვებობის საკითხი სასამართლოს არ განუხილავს.
თამაზ ბაკურიძემ აქცია მომავალი კვირის სამშაბათს ბათუმის საქალაქო სასამართლოსთან დააანონსა. მისი თქმით, საერთო სასამართლოები არ იზიარებენ უზენაესი სასამართლოს პრაქტიკას: „უზენაესმა სასამართლომ ერთ-ერთ საქმეზე თქვა, რომ არ უნდა დაკმაყოფილდეს გამოსახლების შესახებ მოთხოვნა, თუკი არ იქნება გამორკვეული გარემოებებიო. პოლიციას დღეს აღარ შეუძლია პირდაპირ გამოასახლოს ვინმე, მაგრამ სასამართლო აკმაყოფილებს ამ მოთხოვნას დეტალური შესწავლის გარეშე და მოცემულობა მაინც არ შეცვლილა.“
