უკრაინაში 5160 სამხედრო მოსამსახურე ქალი ხელმძღვანელ თანამდებობაზეა – ამის შესახებ უკრაინის თავდაცვის სამინისტროს სამხედრო მედიაცენტრი ავრცელებს განცხადებას.
ოფიციალური ინფორმაციით, ამჟამად უკრაინის შეიარაღებული ძალების პერსონალის 7.3% ქალია – ეს არის 62,062 ადამიანი. მათგან 43 479 სამხედრო მოსამსახურეა და 18 583 – სამოქალაქო თანამშრომელი.
ჯამში ქალები შეადგენენ უკრაინის შეიარაღებული ძალების 5,3%-ს, კერძოდ:
ოფიცერი – 7709 (6,6%);
სერჟანტი-მაიორი – 11 732 (6,6%);
ჯარისკაცი – 22704 (4,4%);
კურსანტი – 1334 (18,1%).
საბრძოლო ზონაში დავალებებს 5 ათასი ჯარისქალი ასრულებს.
უკრაინის თავდაცვის სამინისტროს ცნობით, რუსეთის უკრაინაში სრულმასშტაბიანი შეჭრის შემდეგ საგრძნობლად გაიზარდა იმ ქალების რიცხვი, რომლებიც უკრაინის მცველთა რიგებს შეუერთდნენ.
უკრაინის თავდაცვის მინისტრის მოადგილემ, ნატალია კალმიკოვამ განაცხადა, რომ უკრაინაში ბრძოლის ველზე ახლა „უახლეს მსოფლიო ისტორიაში ქალების ყველაზე დიდი რაოდენობაა“.
თავდაცვის სამინისტროს ინფორმაციით, ხელმძღვანელ თანამდებობებზე 5160 ქალი სამხედრო მოსამსახურეა, მათ შორის 2890 ოფიცერი და 2270 – სერჟანტი. გარდა ამისა, უკრაინაში 13 487 ქალს აქვს საომარ მოქმედებებში მებრძოლის სტატუსი.
