ბათუმში, დემოკრატიული ჩართულობის ცენტრში, 24 სექტემბერს გაიმართება შეხვედრა ბათუმის საჯარო და კერძო ზოგადსაგანმანათლებლო სკოლების სამოქალაქო განათლების პედაგოგებთან ევროკავშირის მიერ საქართველოს ხელისუფლებისთვის დაკისრებული 12 რეკომენდაციის შესრულების შეფასებაზე.
შეფასება ეყრდნობა სამოქალაქო საზოგადოების ორგანიზაციების ერთობლივ ანგარიშს. შეხვედრას წარუძღვება „საერთაშორისო გამჭვირვალობა – საქართველოს“ ბათუმის ოფისის და სამოქალაქო საბჭოების კოორდინატორი მალხაზ ჭკადუა.
შეხვედრა, ასევე, შეეხება ისეთ თემებს, როგორიცაა: სამოქალაქო განათლების როლი ქვეყნის ევროპული ინტეგრაციის გზაზე და ახალგაზრდა თაობის ამომრჩევლებში პოლიტიკური კულტურის გაღრმავებაში.
შეხვედრა დემოკრატიული ჩართულობის ცენტრში [26 მაისის ქუჩა, #31] 24 სექტემბერს, 16:00 საათზე დაიწყება და დაახლოებით 2 საათს გაგრძელდება.
შეხვედრაზე მიმოხილული იქნება მედიისა და სამოქალაქო საზოგადოების სხვა აქტორების როლი ევროინტეგრაციის გზაზე და არსებული გამოწვევები.
დასწრება თავისუფალია.
