დღეს, 13 სექტემბერს, დიდი ბრიტანეთის თავდაცვის სამინისტროს დაზვერვა ყოველდღიურ მოკლე ცნობებში რუსეთ-უკრაინის ომის შესახებ, ტვიტერზე რუსეთის ახალი, 25-ე გაერთიანებული არმიის შესახებ წერს.
დაზვერვის ცნობით, რუსეთის ახალი 25-ე გაერთიანებული არმიის ნაწილები, დიდი ალბათობით, პირველად განლაგდნენ უკრაინაში და, სავარაუდოდ, ორიენტირებული არიან ლუგანსკის ოლქზე, ქვეყნის ჩრდილო-აღმოსავლეთით.
ჯერ კიდევ 2023 წლის აგვისტოში ნათქვამი იყო, რომ ეს დანაყოფი უკრაინაში მხოლოდ 2023 წლის დეკემბრიდან განთავსდებოდა – წერს დაზვერვა და მიიჩნევს, რომ სავარაუდოდ, ქვედანაყოფები სასწრაფოდ იქნა გაგზავნილი ფრონტზე, რადგან რუსეთი აგრძელებს ბრძოლას ფრონტის ძალიან ვრცელ ხაზზე, უკრაინა კი განაგრძობს კონტრშეტევას სამ მიმართულებაზე.
თუმცა ამავე დროს, დაზვერვა აღნიშნავს, რომ შესაძლებელია რუსეთმა გამოიყენოს 25-ე არმიის სარეზერვო ნაწილები მეტი ოპერატიული მოქნილობისთვის.
რუსეთის სახმელეთო ჯარების 25-ე გაერთიანებული არმია რუსეთის შეიარაღებული ძალების რეზერვია, შეიქმნა 2023 წლის ივნისის დასაწყისში, აღმოსავლეთის სამხედრო ოლქის სამხედრო-ადმინისტრაციული ერთეულის ბაზაზე.
რუსული მედიის ცნობით, არმია 30 ათას, კონტრაქტით აყვანილ ჯარისკაცს აერთიანებს და შედგება სატანკო და საარტილერიო ბატალიონებისგან.
