პირველ ივლისს უკრაინაში, ქალაქ ბუჩაში, გაიხსნა ინსტალაცია – მემორიალი ქალაქის იმ მცხოვრებთა პატივსაცემად, რომლებიც რუსმა სამხედროებმა ოკუპაციის დროს მოკლეს.
მემორიალი ბუჩას ქალაქის პარკის შესასვლელთან დადგეს. მემორიალზე გამოფენილია ბუჩაში მოკლული, 501 იდენტიფიცირებული ადამიანის სახელი და გვარი და დაბადების და დაღუპვის წლები.
მემორიალი ბუჩაში. ფოტო: EPA-EFE/OLEG PETRASYUK
მემორიალი ბუჩაში. ფოტო: EPA-EFE/OLEG PETRASYUK
2022 წელს, რუსეთის უკრაინაზე თავდასხმის შემდეგ, ქალაქი ბუჩა რამდენიმე კვირის მანძილზე რუსი სამხედროების მიერ იყო ოკუპირებული. მას შემდეგ, რაც ბუჩა უკრაინელებმა დაიბრუნეს, ქალაქის ქუჩებში მრავალი სამოქალაქო პირის ცხედარი იპოვეს, ათეულობით მათგანს ხელები ზურგს უკან ჰქონდა შეკრული.
„ბუჩას ხოცვა-ჟლეტა“ – ასე უწოდეს მსოფლიოს ლიდერებმა რუსი სამხედროების სისასტიკეს ბუჩაში.
ბუჩა. მშვიდობიანი მოქალაქეების ხელებშეკრული ცხედრები ქალაქის ქუჩაში. 2022 წლის 3 აპრილი. EPA/MIKHAIL PALINCHAK
