ხულო-ადიგენის ცენტრალურ გზაზე, სოფლების – დიოკნისის, ტაბახმელასა და ბოძაურის ტერიტორიაზე, თოვლის დნობის შედეგად წყალი უსისტემოდ მიედინება, რადგან სანიაღვრე არხები აქ არ არის. ეს ის ადგილია, სადაც რამდენიმე კვირის წინ მეწყრის ჩამოწოლის გამო გზა ჩაიკეტა.
„ხულო-ადიგენის ცენტრალური გზის მონაკვეთზე თითქმის ყველგან ანალოგიური სიტუაციაა და არა მხოლოდ ამ მონაკვეთზე. ხოლო აქ [დიოკნისი-ტაბახმელა-ბოძაურის ცენტრალური გზის მონაკვეთზე], გზა მართლაც ძალიან ცუდ მდგომარეობაშია. ვერ მოძრაობენ დაბალი გამავლობის მანქანები.
რახან ცენტრალურ გზას არ აქვს სანიაღვრე არხები, წყალი ცენტრალური გზის სავალ ნაწილზე მოედინება, რამაც ცენტრალური გზის ერთ მონაკვეთზე მეწყერიც გამოიწვია.
ხულოში მეწყრული ზონებია გააქტიურებული, ცუდ მდგომარეობაშია გზაც, რაც მოსახლეობისთვის და საერთოდ ყველასთვის, ერთ-ერთი მთავარი პრობლემაა. ყველა ამ პრობლემის მოგვარებას ვითხოვთ, მაგრამ საშველი არ არის. ფერხდებიან კურორტ გოდერძიზე მიმავალი მანქანებიც”, – გვითხრა მარად შავაძემ, ხულოს საკრებულოს წევრმა „ერთიანი ნაციონალური მოძრაობიდან“.
მისი თქმით, წყალი ახლაც უსისტემოდ მიედინება ცენტრალური გზის სავალ ნაწილზე, რამაც შესაძლოა ისევ გამოიწვიოს მეწყერი იმავე ან სხვა ზონებში და ამიტომაც არ შეიძლება ცენტრალური გზის უყურადღებოდ დატოვება.
დიოკნისი-ტაბახმელა-ბოძაურის ცენტრალური გზის მონაკვეთი
„ბათუმელები“ ამ თემაზე საქართველოს გზების დეპარტამენტს დაუკავშირდა. დეპარტამენტს ვკითხეთ, არის თუ არა წყლის დინება უშუალოდ მაგისტრალზე საფრთხის შემცველი, რა კეთდება ან იგეგმება ამ კუთხით და, ასევე, ამ მონაკვეთში ფერდსამაგრი სამუშაოების ჩატარების საჭიროება თუ დგას.
„როგორც მოგეხსენებათ, უხვმა ნალექმა გამოიწვია აღნიშნულ მონაკვეთზე ფერდების დამეწყვრა, თუმცა ამ ეტაპზე ადგილზე იმყოფებიან საავტომობილო გზების დეპარტამენტის შესაბამისი სამსახურის წარმომადგენლები და მიმდინარეობს მოკვლევითი სამუშაოები, რათა გატარდეს ფერდების დაცვითი ღონისძიებები.
მოძრაობა მხოლოდ მაღალი გამავლობის ავტომობილებისთვის არის გახსნილი“ – წერილობით გვიპასუხეს დეპარტამენტის პრესსამსახურიდან.
