ლატვიის პარლამენტმა ბოლო მოსმენით მიიღო ცვლილებები უკრაინის მხარდაჭერის შესახებ კანონში, რომლის თანახმადაც ნასვამი მძღოლებისთვის ჩამორთმეულ ავტომანქანებს უკრაინაში გადაიყვანენ – ამის შესახებ „ბიბისი“ წერს სააგენტო LETA-ზე დაყრდნობით.
ავტომობილების გადაცემის შესახებ გადაწყვეტილებას საბოლოოდ ლატვიის მთავრობა მიიღებს. სამთავრობო კოალიცია ამ კვირაში შეთანხმდა, რომ ავტომანქანები შეიძლება გადაეცეს უკრაინის არმიას.
„ჩვენ შეგვიძლია მთვრალი მძღოლებისთვის ჩამორთმეული ავტომანქანები გავყიდოთ, გადასამუშავებლად ან სათადარიგო ნაწილებისთვის, მაგრამ ვხედავთ, რომ ამ პირობებში ავტომანქანები სასარგებლო მხარდაჭერა იქნება უკრაინელი ხალხისთვის“, – ციტირებს LETA ლატვიის პარლამენტის თავდაცვის, შინაგან საქმეთა და კორუფციის პრევენციის კომისიის თავმჯდომარეს, რაიმონდ ბერგმანისს.
კანონი ნასვამი მძღოლებისთვის ავტომანქანების ჩამორთმევის შესახებ ლატვიაში გასულ წელს მიიღეს.
ავტომანქანას ჩამოართმევენ მძღოლს, რომლის სისხლში გარკვეული რაოდენობის ალკოჰოლის ან ნარკოტიკების კვალი აღმოჩნდება, ასევე, თუ იგი უარს იტყვის ტესტის ჩატარებაზე ალკოჰოლსა და ნარკოტიკზე.
_____________
ფოტოზე: რიგა. ფოტო: ვიკიპედია
