აჭარის უმაღლესი საბჭოს წევრები, „რესპუბლიკელი“ გიორგი მასალკინი და „ეროვნული ფორუმის“ წევრი, მერაბ აბაშიძე აჭარის უმაღლესი საბჭოს არჩევნების ე.წ გერმანული მოდელით ჩატარებას მხარს უჭერენ.
„ვამზადებთ საკანონმდებლო ინიციატივას, უმაღლესი საბჭოს არჩევნების გერმანული მოდელით ჩატარების თაობაზე. მსგავსი საკითხის განხილვა დაწყებულია საქართველოს პარლამენტში. დღეს 12 საათზე გაიმართა კონსულტაციები დეპუტატებთან, ასევე, კონსულტაციები არასამთავრობო ორგანიზაციების წარმომადგენლებთან, რომლებმაც გამოთქვეს სურვილი და მზადყოფნა მონაწილეობა მიიღონ კანონპროექტის განხილვაში“- აცხადებს მერაბ აბაშიძე.
მისი თქმით, გერმანული მოდელი უფრო დემოკრატიულია ვიდრე არსებული და ხელს შეუწყობს ამომრჩეველთა ინტერესების რეალურ ასახვას.
„არსებული კანონით, სახელისუფლებო პარტიას ყოველთვის აქვს შესაძლებლობა მაჟორიტარული არჩევნების გზით, მიიღოს აბსოლუტური უმრავლესობა. ეს პრაქტიკა ჩვენი აზრით არ არის დემოკრატიული . გერმანული მოდელი კი გულისხმობს, რომ პარტიამ რომლემაც დააგროვა 30 პროცენტი, ამ ოდენობის შესაბამისი რაოდენობის დეპუტატები ეყოლება პარლამენტში“-ამბობს გიორგი მასალკინი. მისი თქმით, თუ საქართველოს პარლამენტი გერმანულ მოდელს არ მიიღებს, ავტონომიური რესპუბლიკის კონსტიტუცია იძლევა შესაძლებლობას რომ არჩევნები ამ მოდელით ჩატარდეს.
