დღეს, 31 დეკემბერს უკრაინაში საჰაერო განგაში იყო გამოცხადებული.
დაახლოებით შუადღეზე ცნობილი გახდა რუსეთიდან საჰაერო თავდასხმის შესახებ, ამუშავდა თავდაცვის საჰაერო სისტემა, თუმცა თავდასხმას მაინც მოჰყვა მსხვერპლი და ნგრევა.
კიევის მერის, ვიტალი კლიჩკოს ცნობით, რუსეთის სარაკეტო თავდასხმის შედეგად კიევში ერთი ადამიანი დაიღუპა, 20 ადამიანი კი დაშავდა, მათ შორისაა ჟურნალისტი იაპონიიდან.
უკრაინული მედიის ცნობით, საჰაერო თავდასხმის შედეგად არიან დაჭრილები უკრაინის სხვადასხვა ოლქებში, რამდენიმე ოლქში ჩამოგდებული ნამსხვრევები მოხვდა საცხოვრებელ სახლებს, რამაც ხანძარი გამოიწვია.
ბოლო სამი დღის განმავლობაში ეს არის რუსეთის მეორე ფართომასშტაბიანი თავდასხმა უკრაინის რამდენიმე რეგიონზე ერთდროულად. ბოლო მსგავსი თავდასხმა 29 დეკემბერს იყო, როცა რუსეთმა უკრაინის მიმართულებით 120-ზე მეტი რაკეტა ისროლა.
დღეს, გაერთიანებული სამეფოს დაზვერვის 31 დეკემბრის ანგარიშში აღნიშნული იყო, რომ მოსალოდნელია რუსეთმა ამ დღეებში კვლავ დაარტყას უკრაინას, რათა შეარყიოს უკრაინის მოსახლეობის სულისკვეთება საახალწლო არდადეგების პერიოდში.
____________
რუსეთის თავდასხმის შედეგად დაზიანებული შენობა კიევში, 31 დეკემბერი
