გაერთიანებული სამეფოს დაზვერვის 17 დეკემბრის ანგარიში უკრაინაზე შორი მანძილის რაკეტებით გახშირებულ თავდასხმას მიმოიხილავს. როგორც ანგარიშშია აღნიშნული, შეტევების ზრდა მცირეა და ძირითადად საჰაერო და საზღვაო საკრუიზო რაკეტებს მოიცავს.
ბრიტანული დაზვერვა, ასევე დარწმუნებულია, რომ უკრაინის კრიტიკულ ინფრასტრუქტურაზე თავდასხმებში ასევე მონაწილეობს ირანის მიერ რუსეთისთვის მიწოდებული დრონები.
ირანული დრონები რუსეთმა ომში სექტემბერში ჩართო. უკრაინის თავდაცვის სამინისტროს ინფორმაციით, უკრაინის სამხედრო ძალებმა უკრაინის ტერიტორიაზე ირანული წარმოების დრონი „შაჰედ 136“ პირველად 2022 წლის 13 სექტემბერს, კუპიანსკში ჩამოაგდო.
რუსეთისთვის ირანული დრონების გადაცემის შესახებ ცნობილი პირველად აგვისტოში გახდა. ირანი თავდაპირველად უარყოფდა რუსეთისთვის დრონების მიწოდებას, თუმცა მსხვილმა მედიაგამოცემებმა, ირანელ დიპლომატებსა და მაღალჩინოსნებზე დაყრდნობით მოიპოვეს ინფორმაცია, რომ ირანი რუსეთს არა მხოლოდ დრონებს აწვდის, არამედ შეუთანხმდა ბალისტიკურ რაკეტების მიწოდებაზეც.
ბრიტანული დაზვერვის ინფორმაციით, რუსეთი ირანულ დრონებს ამ ეტაპზე თავისი ტერიტორიიდან, კრასნოდარის ოლქიდან უშვებს. დაზვერვა ასევე აღნიშნავს, რომ მანამდე ირანული დრონების გასაშვებ ადგილად, ძირითადად, ოკუპირებული ყირიმი გამოიყენებოდა.
გაშვების ადგილის შეცვლა, სავარაუდოდ, გამოწვეულია რუსეთის სიფრთხილესთან ყირიმის დაუცველობასთან დაკავშირებით. ამავდროულად ახალი ადგილი მოსახერხებელია რუსეთში იარაღის სავარაუდო ჩამოსვლის ადგილიდან, ასტრახანიდან მარაგების შესავსებად, – ვკითხულობთ გაერთიანებული სამეფოს დაზვერვის ანგარიშში.
_________
ფოტოზე: ირანული დრონი. ფოტო: ირანის არმია
