თურქული მედია წერს, რომ თურქეთის მოქალაქეები საქართველოში საგანგებოდ მიდიან iPhone-ის ახალი მოდელის შესაძენად, რომელიც საქართველოში უფრო იაფი ღირს, ვიდრე თურქეთში, რადგან თურქეთის მოქალაქეებს საზღვრის კვეთის დროს უკან უბრუნდებათ გადასახადები [tax].
თურქული გამოცემა „ჰურიეთი“ ამ ტენდენციას „სატელეფონო ტურიზმს“ უწოდებს.
გამოცემის ცნობით, სარფის საზღვარს არა მარტო თურქეთ-საქართველოს საზღვრისპირა რეგიონებში მცხოვრები თურქეთის მოქალაქეები კვეთენ „აიფონის“ შესაძენად, არამედ საქართველოში „სატელეფონო ტურიზმისთვის“ მიდიან თურქეთის სხვა ქალაქებიდანაც.
„Apple-მა სექტემბერში წარადგინა თავისი ახალი iPhone 14, iPhone 14 Pro და iPhone 14 Pro Max მოდელები. ამ მოდელების ფასები თურქეთში მერყეობს 30 000 თურქული ლირიდან (1 600$) 57 000 ლირამდე (3 100$).
მაგრამ თუ თურქი მომხმარებლები ამ ტელეფონებს საქართველოში ყიდულობენ, მათ ეძლევათ უფლება გადასახადის ანაზღაურებაზე. გადასახადის დაბრუნებით, iPhone-ის ფასი საქართველოში ყიდვის შემთხვევაში დაახლოებით 15 000 ლირით იაფია, ვიდრე თურქეთში.
ადამიანებს უნდა ჰქონდეთ საზღვარგარეთ მოგზაურობის დროს შეძენილი ტელეფონები და დარეგისტრირებული IMEI ნომერი, რათა შეძლონ თავიანთი მოწყობილობების გამოყენება თურქეთში. ამჟამად, ამ პროცესისთვის რეგისტრაციის საფასური 2 700 ლირაა, მაგრამ სავარაუდოდ მომავალ წელს 6 000 ლირამდე გაიზრდება.
მოგზაურებს პრობლემა არ ექმნებათ საზღვრის კვეთისას, თუმცა გადასახადის დაბრუნებისთვის გრძელ რიგებში ლოდინი უწევთ“ – წერს გამოცემა.
„ბათუმში მხოლოდ აიფონის საყიდლად ჩამოვედი. 24 500 ლირა გადავიხადე iPhone 14 Pro-ში, ხოლო თურქეთში 45 000 ლირადან 50 000 ლირამდე ღირს. ასევე, საბაჟოზე ავიღე 2 900 ლირა გადასახადის ანაზღაურების სახით,“ – უთხრა გამოცემას ერთ-ერთმა მოქალაქემ.
თურქეთიდან „სატელეფონო ტურიზმის“ ფონზე საქართველოდან თურქეთში „სასურსათო და მედიკამენტების ტურიზმის“ ბუმია. ყოველდღიურად საქართველოს ასობით მოქალაქე გადადის თურქეთის რესპუბლიკაში სასურსათო პროდუქტების, მედიკამენტების და ტანსაცმლის შესაძენად, რომელიც თურქეთში უფრო იაფია, ვიდრე საქართველოში.
_________________________
ამავე თემაზე:
რატომ ღირს გერმანიაში პროდუქტები საქართველოზე ბევრად იაფი – 5 ქვეყნის მაგალითი
