დღეს, 5 ოქტომბერს, მასწავლებლებთან სატელევიზიო შეხვედრისას, რუსეთის ფედერაციის პრეზიდენტმა განაცხადა, რომ რუსეთს უკრაინელი ხალხისადმი „უდიდესი პატივისცემა“ აქვს, მიუხედავად „მიმდინარე სიტუაციისა“.
ინფორმაციას, „როიტერსი“ ავრცელებს.
გამოცემის ცნობით, რუსეთის მიერ ბოლოს ანექსირებულ ოთხ უკრაინულ რეგიონზე საუბრისას რუსეთის პრეზიდენტმა, ვლადიმერ პუტინმა თქვა, რომ იქ მდგომარეობის „დასტაბილურებას“ მოელის.
______
ბოლო დღეები უკრაინის კონტრშეტევისთვის ძალიან წარმატებული აღმოჩნდა. გუშინ, 4 ოქტომბერს, გვიან ღამით უკრაინამ ხერსონის კიდევ ორი დასახლებული პუნქტის გათავისუფლების შესახებ განაცხადა.
დღესვე უკრაინამ თქვა, რომ უკრაინის არმიამ ლუგანსკის ოლქში რამდენიმე დასახლებული პუნქტი გაათავისუფლა.
„გულწრფელად რომ ვთქვათ, 17 დასახლების დაკარგვა ხერსონის რეგიონში ძალიან შემაშფოთებელია“, – თქვა რუსმა პროპაგანდისტმა და რუსეთის „პერვი კანალის“ წამყვანმა ოლგა სკაბაევამ მას შემდეგ, რაც კოლეგისგან ხერსონში არსებული ვითარების შესახებ ინფორმაცია მოისმინა.
უკრაინაში შეჭრილი რუსეთის ძალების მდგომარეობაზე, მათ შორის, ანექსირებულ ხერსონში არსებულ ვითარებაზე, მსჯელობისას ოლგა სკაბაევამ დასძინა:
„ფრონტზე სიტუაცია ძალიან რთულია. მცოდნე ხალხი ამბობს, რომ ეს მხოლოდ დასაწყისია, იმ გაგებით, რომ მომდევნო 3 კვირა კიდევ უფრო რთული იქნება და უნდა მოვიცადოთ. დღეს თავდაცვის მინისტრმა შოიგუმ თქვა, რომ 200 000 [რეზერვისტი] უკვე მობილიზებულია და ისინი უახლოეს მომავალში აღმოჩნდებიან ფრონტზე.
სავარაუდოდ, შეტევაზე გადავალთ. მაგრამ ახლა ზელენსკია შეტევაზე“.
ამავე თემაზე:
კრემლი უნდა შფოთავდეს ლუგანსკის საზღვრებთან უკრაინელთა მიახლოებით – ბრიტანეთის დაზვერვა
