საზოგადოებრივი მოძრაობა „ალტერნატივას“ აქტივისტი ხათუნა ბერიძე აცხადებს, რომ ის სასამართლომ 500 ლარით დააჯარიმა წარწერისთვის – „Слава Україні!“.
ხათუნა ბერიძის თქმით, ის გაასაჩივრებს სასამართლოს გადაწყვეტილებას.
„წარწერა გავაკეთე მაისში, ერთ-ერთი შენობის ვიტრინაზე, სადაც იმ დროს განთავსებული იყო პრორუსი „ალტ-ინფოს პარტიის ოფისი. თავად შენობის მეპატრონეს არ მიუმართავს პოლიციისთვის, ბათუმის მუნიციპალურმა ინსპექციამ თავისი ინიციატივით გამოწერა სამართალდარღვევის ოქმი“ – ამბობს ხათუნა ბერიძე.
მისი თქმით, წარწერის გაკეთების დროს „მუნიციპალურმა ინსპექცია“ ადგილზე არ ყოფილა. „ფეისბუკში ჩემს მიერ განთავსებული ვიდეოს ნახვის შემდეგ გამომიწერა ჯარიმა“ – ამბობს ხათუნა ბერიძე.
სასამართლოზე მუნიციპალურმა ინსპექციამ განაცხადა, რომ მიუხედავად იმისა, რომ წარწერა კერძო საკუთრებაზე იყო გაკეთებული „ეს არ გამორიცხავს თვითმმართველი ერთეულის იერსახის დამახინჯების ფაქტს“.
ხათუნა ბერიძე კი მიიჩნევს, რომ სასამართლოს და მუნიციპალური ინსპექციის გადაწყვეტილება პოლიტიკურია, „რადგან ჩვენ გვყავს პრორუსი ხელისუფლება და მართლმსაჯულება“-ამბობს ხათუნა ბერიძე.
„სხვა რამე დამეწერა კიდევ კი, მაგრამ Слава Україні დღეს ისეთი მხარდამჭერი განცხადებაა, რომ არათუ კერძო ფასადებზე, ადმინისტრაციულ შენობებზეც კი აწერენ უცხოეთში. და ეს წარწერა რომ აღიზიანებს დღეს ხელისუფლებას, ეს არის მთავარი პრობლემა“ – ამბობს ბერიძე.
