„ქართველები თურქეთში თხილის საკრეფად აღარ ჩამოდიან“, – ამბობს ზია ბაირაქი, თურქეთში, ქალაქ უნიეში მცხოვრები. ტრადიციულად წლის ამ დროს საქართველოს ასობით მოქალაქე მიდიოდა თურქეთში თხილის საკრეფად.
იმის გამო, რომ თურქული ლირა გაუფასურდა, წელს ეს ნაკადი მნიშვნელოვნად შემცირებულია.
„რომ ვუყურებთ, წინა წელთან შედარებით წელს ქართველები ძალიან ცოტა ჩამოვიდნენ. თავიდან 200 ლირა იყო დღიური ხელფასი, მერე ერთ კვირაში 250 ავიდა, ახლა 300 ლირაზეა. ფული რომ გაუფასურებულია, ქართველები არ ჩამოვიდნენ. ყველა ევროპაში მიდის,“ – ამბობს „ბათუმელებთან“ ზია ბაირაქი.
მას სოციალურ ქსელში ვესაუბრეთ.
მისი თქმით, გასულ წლებში თხილის საკრეფად თურქეთის აღმოსავლეთ რეგიონებიდან – ურფადან და დიარბაქირიდან ჩადიოდნენ. წელს ეს ნაკადიც შემცირებულია, რამაც გარკვეული კრიზისი შეუქმნა ფერმერებს.
„ძველი ხალხი ამბობდა, თხილობაზე მიწიდან ადამიანს ვაჩენთ, რომ თხილი მოვაკრეფინოთო. ზუსტად ასეთი სიტუაციაა ახლა. თხილის ბაღების მფლობელები თვითონ კრეფენ,“ – ამბობს ზია ბაირაქი.
მისივე თქმით, მართალია, თურქეთის პრეზიდენტმა რეჯეფ თაიპ ერდოღანმა დააანონსა, რომ 1 კილოგრამი თხილი 54 ლირა ეღირებოდა, თუმცა რეალურად 42 ლირა ღირს. ამასთან, გაზრდილია თხილის მოკრეფის ხარჯები.
„300 ლირა [46 ლარი] არის ერთი ადამიანის დღიური ხელფასი. ვთქვათ, 10 ადამიანისგან შემდგარი ჯგუფია, თითოეული იღებს 300 ლირას, ამასთან, ათ ადამიანს ეხლება მათი ზედამხედველი. ის იღებს ორმაგს. მანქანით თუ მოემსახურა, მოიყვანა-წაიყვანა დღიურად, დღეში 600 ლირას მანქანა წერს,“ – გვიხსნის ზია ბაირაქი.
თხილის სეზონი თურქეთში აგვისტოს ბოლოს დასრულდება.
