უკრაინაში ჩაიტანეს პირველი ამერიკული სარაკეტო სისტემები M270.
ამის შესახებ უკრაინის თავდაცვის მინისტრმა, ოლექსი რეზნიკოვმა გაავრცელა ინფორმაცია 15 ივლისს.
„უკრაინის შეიარაღებული ძალების შორი მოქმედების იარაღების ოჯახში მატებაა: ჩამოვიდა პირველი M270 MLRS! ისინი კარგი კომპანიონები იქნებიან HIMARS-ისთვის ბრძოლის ველზე”, – წერს რეზნიკოვი ტვიტერზე.
მრავალფუნქციურ მოდულურ სარაკეტო სისტემას — M270 MLRS-ს შეუძლია გამოიყენოს რამდენიმე ტიპის სხვადასხვა რაკეტა, ძირითადად, 227 მმ-იანი M26 ტიპის უმართავი რაკეტები ან M30/31 GMLRS სერიის მართვადი კორექტირებადი რაკეტები, რომლებსაც შეუძლია სამიზნეებს მისწვდეს 70-80-120 კმ-ზე, ხოლო უახლოეს მოდიფიკაციებში, გაზრდილი მანძილის GMLRS რაკეტებით — 150 კმ მანძილზე. ისინი დღესდღეობით საარტილერიო სისტემებში ყველაზე მაღალტექნოლოგიურ საშუალებად ითვლება.
ასევე, ამ სისტემებით შესაძლებელია ოპერატიულ-ტაქტიკური ბალისტიკური რაკეტების გაშვება, რომლებიც 300 კილომეტრამდე რადიუსში მოქმედებს.
ამერიკის შეერთებული შტატების შემდეგ, მრავალჯერად სარაკეტო სისტემებს უკრაინას გაერთიანებული სამეფოც გადასცემს.
____________
ფოტოზე: M270 MLRS. ფოტო: ვიკიპედია
