რუსეთის უშიშროების საბჭოს მდივანმა ნიკოლაი პატრუშევმა ლიეტუვის გადაწყვეტილებას კალინინგრადის რეგიონში საქონლის ტრანზიტის შეზღუდვის შესახებ მტრული უწოდა. მან თქვა, რომ რუსეთი მალე უპასუხებს კალინინგრადის სატრანსპორტო ბლოკადას და პასუხი იქნება სერიოზული და ლიეტუვის მოსახლეობისთვის საგრძნობი.
„მოსკოვის პასუხი ლიეტუვის მიერ კალინინგრადის რეგიონის სატრანსპორტო ბლოკადაზე პირდაპირ გავლენას მოახდენს ბალტიის რესპუბლიკის მცხოვრებლებზე” – განაცხადა პატრუშევმა დღეს, 21 ივნისს, რუსეთის ჩრდილო-დასავლეთის ეროვნული უსაფრთხოების საკითხების სხდომაზე. ამის შესახებ რუსული სახელისუფლებო მედია Tass-ი წერს.
გასულ კვირას ლიეტუვას რკინიგზამ აცნობა კალინინგრადის რკინიგზას, რომ 18 ივნისიდან შეწყვეტდა ევროკავშირის სანქციებს დაქვემდებარებული საქონლის ტრანზიტს.
პატრუშევის თქმით, ნატო აძლიერებს სამხედრო და სადაზვერვო წარმომადგენლობას ქვეყნის ჩრდილო-დასავლეთ საზღვრებთან და „სიტუაცია რეგიონში ყალიბდება დასავლეთის უპრეცედენტო პოლიტიკური, საინფორმაციო და ეკონომიკური ზეწოლის ქვეშ“.
„ამის უკანასკნელი მაგალითია ლიეტუვის მიერ საქონლის დიდი ჯგუფის ტრანზიტის ბლოკადა.
რუსეთი აუცილებლად უპასუხებს ასეთ მტრულ ქმედებებს. მათი შედეგები სერიოზულ ნეგატიურ ზეგავლენას მოახდენს ლიეტუვის მოსახლეობაზე“, – თქვა პატრუშევმა.
