დღეს, 30 მაისს, უკრაინის ქალაქ სევეროდონეცკის გარეუბანში რუსეთის შეიარაღებული ძალები გამოჩნდნენ, მოკლულია ორი სამოქალაქო პირი, მძიმე ბრძოლები მიდის სევეროდონეცკისა და ლისიჩანსკისთვის.
ინფორმაციას ლუგანსკის რეგიონული სამხედრო ადმინისტრაციის ხელმძღვანელი, სერგეი გაიდაი ავრცელებს ტელეგრამზე.
„მძიმე ბროლებია სევეროდონეცკისა და ლისიჩანსკისთვის. მტერი იყენებს ყველა შესაძლო იარაღს, იყენებს თვითმფრინავებს. ჩვენი სამხედროები მტკიცედ იცავენ თავს, რომ არ დაუშვან მტერი ქვეყნის შუაგულში.
რუსული ჭურვებით სევეროდონეცკის 2 მცხოვრები დაიღუპა და 5 დაიჭრა. მათი უმეტესობა ქალაქის ძველი უბნის ერთი კორპუსის მცხოვრებია. ისინი ეზოში საჭმელს ამზადებდნენ, როცა მოულოდნელად დაბომბვა დაიწყო“, – წერს სერგეი გაიდაი.
ქალაქი სევეროდონეცკი ლუგანსკის ოლქში მდებარეობს, ქალაქში 100 ათასზე მეტი ადამიანი ცხოვრობს.
