„ჩვენი თავისუფალი და დამოუკიდებელი ქვეყანა დაფუძნებულია დემოკრატიულ და ჰუმანისტურ ფასეულობებზე. გვჯერა, რომ საქართველოს მომავლის ქვაკუთხედია: დამოუკიდებლობა, თავისუფლება, მშვიდობა და დემოკრატია. შესაბამისად, ჩვენი ქვეყნის ერთადერთი სასიცოცხლო ვექტორი ევროკავშირისკენ არის მიმართული“, – ეს არის ნაწყვეტი წერილიდან, რომლის გაგზავნა ევროკავშირისთვის საქართველოს ნებისმიერ მოქალაქეს შეუძლია.
ge2eu.com – ესაა ახლად შექმნილი ვებგვერდი, საიდანაც წერილის გაგზავნაა შესაძლებელი.
წერილზე ხელის მოწერით საქართველოს მოქალაქეები ადასტურებენ თავიანთ სურვილს საქართველოს ევროკავშირში გაწევრიანებაზე.
„წერილის მიზანია, დავანახოთ ევროკავშირს ჩვენი ხალხის – საზოგადოების ერთსულოვნება, მტკიცე გადაწვეტილება და მისწრაფება საქართველოს ევროპულ ოჯახში გასაწევრიანებლად,“ – ნათქვამია საიტზე გამოქვეყნებულ საინფორმაციო ტექსტში.
წერილი შეიძლება გაიგზავნოს როგორც ინდივიდუალურად, ვებგვერდზე მოცემული ფორმის საშუალებით, ასევე ჯგუფურად, ხელმოწერების შეგროვებით.
რაც შეეხება წერილის შინაარსს, მასში მოკლედ არის მოთხრობილი საქართველოს ისტორიის 200 წელი, რუსეთის მიერ ოკუპაცია და საბჭოთა ტირანიისგან თავის დაღწევა. წერილის ადრესატები კი არიან ევროკომისიის, ევროპარლამენტის, ევროპული საბჭოს ხელმძღვანელი პირები და წევრები.
მთავარი ფოტო: eumetsat
