ნორვეგია გამოყოფს 400 მილიონ კრონს (43,7 მილიონი აშშ დოლარი), რათა დააფინანსოს ბრიტანეთის ინიციატივა, შეიძინონ უკრაინისთვის იარაღი – განაცხადა ნორვეგიის პრემიერ-მინისტრმა დღეს, 26 აპრილს. ინფორმაციას ამის შესახებ „როიტერსი“ ავრცელებს.
ნორვეგიამ, ასევე, შესაძლოა პირდაპირ მიაწოდოს უკრაინას დამატებითი იარაღი – განაცხადა ნორვეგიის პრემიერ-მინისტრმა იონას გაჰრ შტოერმა.
20 აპრილს ნორვეგიის თავდაცვის მინისტრმა თქვა, რომ უკრაინაში კონფლიქტი შეიძლება გახანგრძლივდეს და ქვეყანა რუსეთის აგრესიისთვის წინააღმდეგობის გაწევის საკითხში საერთაშორისო მხარდაჭერაზეა დამოკიდებული. ამიტომ ნორვეგიის მთავრობამ გადაწყვიტა უკრაინას საჰაერო თავდაცვის „მისტრალის“ სისტემა გადასცეს. ნორვეგიის მთავრობის განცხადებით, იარაღი უკრაინაში უკვე გაგზავნილია.
მთავარ ფოტოზე: უკრაინის არმიის მიერ განადგურებული რუსული ტანკი. კიევის რაიონის სოფელ რუსანივი, 2022 წლის 25 აპრილი. ფოტო: EPA-EFE / OLEG PETRASYUK
