უკრაინის თავდაცვის მინისტრის მოადგილის, ჰანა მალარის ინფორმაციით, რუსული მხარის სავარაუდო დანაკარგები 25 თებერვლის, უკრაინის დროით დილის მონაცემებით, ასეთი იყო: 7 თვითმფრინავი, 6 ვერტმფრენი, 30-ზე მეტი ტანკი და 130 საბრძოლო ჯავშანტრანსპორტი.
რუსული ჯარის ძირითადი შემადგენლობის დანაკარგი კი 800 ადამიანია (ციფრები მინისტრის მოადგილის ინფორმაციით, ისევ ზუსტდება).
„დღეს ღამით უკრაინის თავდაცვის ძალებმა მნიშვნელოვანი წინააღმდეგობა გაუწიეს რუს ოკუპანტებს.
რუსეთის შეიარაღებულმა ძალებმა საჰაერო დარტყმები განახორციელეს ქალაქ კროპივნიცკის რაიონში მდებარე ქვედანაყოფებზე. კროპივნიცკი უკრაინის აღმოსავლეთით, კიროვოგროდის ოლქში მდებარე ქალაქია.
მინისტრის მოადგილის ინფორმაციით, ოდესის ოლქის ქალაქ ვილკოვოს თავზე რუსული სამხედრო ვერტმფრენების აქტიური მიმოსვლა შეინიშნება.
უკრაინის შეიარაღებული ძალების საჰაერო დანაყოფები ატარებენ საბრძოლო ოპერაციებს დიმერისა და და ივანკოვოს რაიონებში, სადაც რუსული მხარის ჯავშანტექნიკა გადაადგილდება. უკრაინის შეიარაღებულმა ძალებმა მტრის ტექნიკის გადაადგილება შეაფერხეს – კერძოდ, აფეთქებულია მდინარე ტეტეროვის გადასასვლელი ხიდი,” – წერს ოფიციალურ ფეისბუქგვერდზე უკრაინის თავდაცვის მინისტრის მოადგილე.
უკრაინის მთავრობის ინფორმაციით, ომის პირველი დღის შედეგად მათ მხარეს დაღუპულია სულ მცირე, 137 ადამიანი, რომელთა შორის არიან სამოქალაქო პირებიც.
რუსულმა არმიამ დაბომბა არაერთი სტრატეგიული ობიექტი, დაიკავეს 1986 წელს აფეთქებული ჩერნობილის ატომური ელექტროსადგური.
პარალელურად, დასავლეთის ქვეყნებმა, მათ შორის, აშშ-მ განაცხადეს, რომ რუსეთის აგრესიის საპასუხოდ აწესებენ მძიმე ეკონომიკურ სანქციებს.
