კვარიათში მშენებარე სასტუმროსთან მიწის მასამ დამცავი კედელი გაარღვია [ვიდეო]

კვარიათში, მშენებარე სასტუმროსთან მიწის მასა ჩამოწვა. მიწის მასამ გაარღვია დამცავი კედელი. როგორც ბათუმის მერიაში გვეუბნებიან, ადგილზე იმყოფებიან ტერიტორიული სერვისცენტრის წარმომადგენლები და სიტუაციას შეისწავლიან.

როგორც „ბათუმელებთან“  მუნიციპალური სერვისების სააგენტოს უფროსი ჯაბა ბერიძე ამბობს, მიწის მასა იოანე ლაზის ქუჩაზე ჩამოწვა, ჩამოიშალა  დამცავი კედელი, რომელიც ბერიძის თქმით, კერძო პირმა ორი წლის წინ ჩამოასხა.

„მანდ არის მშენებარე სასტუმრო და როგორც ვიცით, მფლობელმა ჩამოასხა კედელი. სპეციალისტები იყვნენ ადგილზე გასული და სანამ ამინდი არ გამოვა, გაწმენდითი სამუშაოები ვერ განხორციელდება, რადგან შეიძლება უფრო მძიმე პროცესები განვითარდეს, ძალიან სველია მიწა“, – ამბობს ჯაბა ბერიძე.

კითხვაზე – ხომ არ ემუქრება საფრთხე დასახლებულ პუნქტებს, ჯაბა ბერიძე ამბობს, რომ  ამ დროისთვის გზა ჩახერგილია, თუმცა სოფელთან მისასვლელი შემოვლითი გზაც არსებობს. „ძალიან ბევრი მეწყერსაშიშია ზონაა, ამიტომ დაზუსტებით ვერ გეტყვით, კიდევ რა საფრთხე არსებობს“, – ამბობს ბერიძე.

ბათუმში დრეს დილიდან გადაუღებლად წვიმს.