„დღეს, დილის 8 საათზე, გამაღვიძეს, გამიყვანეს და გამაგდეს დილაუთენია ციხიდან. კომიკურია ეს ყველაფერი“ – ამბობს მიხეილ ბატურინი, სააკაშვილის დაცვის ყოფილი წევრი, რომელიც დღეს, 19 ივლისს, გაათავისუფლეს პატიმრობიდან.
ბატურინი, რომელიც საქართველოს მოქალაქეა, დაკავებული იყო „სააკაშვილის ზღვიდან შემოპარვის საქმეზე“.
ამ საქმეზე მსჯავრდებულები დღეს, 19 ივლისს, პრეზიდენტმა სალომე ზურაბიშვილმა შეიწყალა. ამ საქმეზე 2 ბრალდებული უკრაინელი ოფიცერი იყო, ერთი მათგანი კი საქართველოს მოქალაქე, ექსპრეზიდენტ მიხეილ სააკაშვილის დაცვის წევრი. მათ რამდენიმე დღის წინ 4-4 წლით თავისუფლების აღკვეთა შეუფარდეს ბათუმის საქალაქო სასამართლოში.
„ასეთი უსამართლობა და ცირკი, რა ვიცი. ძალიან ვწუხვარ, რომ საქართველოში ეგეთ უსამართლობას აქვს ადგილი“ – უთხრა ტვ „პირველს“ ბატურინმა.
მისი თქმით, ციხეში ყოფნისას, ბოლო ორი დღის განმავლობაში ცდილობდნენ, მას ხელი მოეწერა შეწყალებაზე.
„ხუთშაბათიდან დაიწყო მთელი კამპანია, გრძელდებოდა პარასკევ-შაბათს, როცა ცდილობდნენ ყველანაირად ჩვენი ხელმოწერები მიეღოთ, კადრულობდნენ იმას, რომ მოიტანეს რაღაც სამედიცინო დოკუმენტი, მაგათი ახსნით სავალდებულო იყო ხელმოწერა.
ეს ხდებოდა იმისთვის, რომ დაეფიქსირებინა კამერებს, რომ მე ვაწერ ხელს და არ ჰქონდა მნიშვნელობა რაზე იქნებოდა, ეს ხდებოდა იმისთვის, რომ გაეთამაშებინათ უკრაინელ მეზღვაურებთან, რომ აგერ ბატურინმა მოაწერა ხელი და თქვენც მოაწერეთო“ – ამბობს ბატურინი.
დღეს, 19 ივლისს, ბათუმში საერთაშორისო კონფერენციას უკრაინის პრეზიდენტი ვოლოდიმირ ზელენსკი ესწრება.
უკავშირდება თუ არა ზელენსკის ვიზიტს უკრაინელი ბრალდებულების გათავისუფლება – ოპოზიციის ვერსიით, ზელენსკი საქართველოში ჩამოსვლას არ აპირებდა და საბოლოოდ ეს გადაწყვეტილება თანამემამულეების გათავისუფლების პირობის სანაცვლოდ მიიღო.
