Batumelebi | მოსამართლემ “სააკაშვილის ზღვიდან შემოპარვის საქმე” დაასრულა და თქვა – “ფაქტები ხელისგულზეა”  მოსამართლემ “სააკაშვილის ზღვიდან შემოპარვის საქმე” დაასრულა და თქვა – “ფაქტები ხელისგულზეა”  – Batumelebi
ნეტგაზეთი • RU

მოსამართლემ “სააკაშვილის ზღვიდან შემოპარვის საქმე” დაასრულა და თქვა – “ფაქტები ხელისგულზეა” 

„ფაქტები ხელისგულზეა“, – აღნიშნა დღეს, 5 ივლისს, მოსამართლე დავით მამისეიშვილმა, როცა „სააკაშვილის ზღვიდან შემოპარვის საქმის“ განხილვა დაასრულა. თუმცა განაჩენის გამოცხადება გადადო. წინა სხდომაზე მოსამართლემ თქვა, საბოლოო გადაწყვეტილებასაც დიდი ალბათობით გეტყვითო.

„ჩამოყალიბებული ვარ, მაგრამ რამდენიმე საკითხზე მჭირდება სამართლებრივი მსჯელობა,“ – თქვა მოსამართლე დავით მამისეიშვილმა მას შემდეგ, როცა მან ადვოკატის დასკვნითი სიტყვა მოისმინა.

ადვოკატმა კი დასკვნითი სიტყვა ასე დაიწყო:

„არ ვიცი, რა შეუკვეთა ხელისუფლებამ: უკანონო პატიმრობა მხოლოდ, თუ გამამტყუნებელი განაჩენი…“, – გამოსვლის დასაწყისშივე თქვა ეს ადვოკატმა ბექა ბასილაიამ.

შემდეგ კი, მოსამართლემაც დააზუსტა, რა დარჩა გასარკვევი და რატომ გადაიფიქრა დღეისთვის განაჩენის მიღება:

„საზღვრის გადმოკვეთამდე არის თუ არა ვალდებულება რადიოკავშირით შეატყობინო ეს სახელმწიფოს, ეს არის გასარკვევი,“ – აღნიშნა მოსამართლემ.

დღეს, 5 ივლისს, სასამართლო პროცესი აქციის ფონზე მიმდინარეობდა – სასამართლოსთან ენმ-ს აქტივისტები შეიკრიბნენ და სამართლიანი განაჩენი მოითხოვეს.

ბრალდებულები ღია ზღვაში, იახტაზე, გასული წლის 28 ნოემბერს დააკავეს. საუბარია უკრაინის მოქალაქეებზე – ვოლოდიმერ დიაჩენკოსა და იური ხიმინჩიზე, ასევე საქართველოს მოქალაქეზე – მიხეილ ბატურინზე. მათ გამოძიება საზღვრის ჯგუფურად, უკანონო კვეთას ედავება. მიხეილ ბატურინი უკრაინაში ცხოვრობს და მიხეილ სააკაშვილის დაცვის წევრი იყო. სააკაშვილთან მეგობრობს დანარჩენი ორი ბრალდებულიც. ისინი იახტით მიემგზავრებოდნენ უკრაინიდან თურქეთში, თუმცა საქართველოს ტერიტორიულ წყლებში, გონიოს ნაპირიდან 12 კმ-ში დააკავეს.

„გამოძიებას ჰქონდა ეჭვი, რომ უკანონო მიგრანტი შემოიყვანეს საქართველოში, ეს აღკვეთის შეფარდების პროცესზეც დაადასტურა პროკურორმა, თუმცა განკარგულებაში ეს არ ჩაუწერიათ,“ – ამბობს ადვოკატი ბექა ბასილაია. ზღვაში გაჩერებულ იახტაზე სამართალდამცველებს უნახავთ სველი ჰიდროციკლი და საცურაო ჟილეტი, რამაც ეჭვები მიგრანტის – სავარაუდოდ მიხეილ სააკაშვილის უკანონო შემოყვანაზე გააძლიერა.

ამ საქმეზე უკრაინამ ოფიციალურად საქართველოს ბრალდებულების გათავისუფლებისკენ მოუწოდა

დღევანდელ პროცესზე ადვოკატმა სააკაშვილის შესაძლო შემოპარვის შეთქმულებაზე გააკეთა აქცენტი, რისაც ადვოკატის მტკიცებით, „ოცნებას“ შეეშინდა და გემბანზე მყოფი ადამიანების დაუყონებლივ დაკავება განიზრახა. ადვოკატმა მოსამართლეს ისიც უთხრა, უპატივცემულობაში ნუ ჩამომართვათ, მაგრამ ჩემი აზრით სასამართლოც აიძულეს ეს ადამიანები უკანონოდ დაეპატიმრებიათო და გისოსებისკენ გაიხედა.

„ეს იყოს გასული წლის ნოემბერი, როცა იმართებოდა აქციები და ოპოზიცია პარლამენტს უცხადებდა ბოიკოტს…. ამ დროს გაჩნდა მოსაზრება, რომ სააკაშვილი შესაძლოა შემოპარულიყო საქართველოში  და უცებ ზღვაში, უკრაინიდან თურქეთში მიმავალ გემზე პოულობენ სააკაშვილის დაცვის ყოფილ წევრს…“- აღნიშნა ბექა ბასილაიამ.

ადვოკატმა ყურადღება გაამახვილა კანონმდებლობაზე. მისი მტკიცებით, ბრალდებულებს არც ერთი სამართლებრივი ნორმა არ დაურღვევიათ, რადგან ბრალდებულების იახტა პორტში არ შემოსულა და ეს არც სამხედრო მცურავი საშუალება იყო.

“საზღვრის გახსნას და საზღვრის დარღვევას კანონი წყალში არ ცნობს…ნავსადგურში შემოსვლას დასჭირდებოდა შეტყობინება და არა ტერიტორიულ წყლებში შემოსვლა,” – ხაზგასმით თქვა ადვოკატმა და დასძინა, პორტშიც რომ შემოსულიყო იახტა, არ იყო საჭირო ნებართვა, თუ ეკიპაჟი ნაპირზე არ გადმოვიდოდა.

აქცია სასამართლო პროცესის პარალელურად

„მათ რადიოკავშირით სარგებლობის წესებიც კი არ დაურღვევიათ,“ – აღნიშნა ადვოკატმა ბექა ბასილაიამ და ბრალდების იმ ნაწილს შეეხო, რომლის მიხედვითაც იახტაზე სასაზღვრო პოლიციის რადიოშეტყობინებებს საერთოდ არ უპასუხეს.

ადვოკატმა ყურადღება გაამახვილა იმაზეც, რომ კანონმდებლობით არაა დარეგულირებული ზღვით ტრანსპორტირებისას, მშვიდობიანი გავლის დროს რადიო კავშირით სარგებლობის წესი.

ბექა ბასილაიამ მოსამართლეს გაახსენა მოწმეებიც – მაგალითად, სასაზღვრო პოლიციის მაღალჩინოსანი, რომელმაც ერთ-ერთ სხდომაზე თქვა, რომ მშვიდობიანი გავლის დროს მცურავი საშუალების მხრიდან შეტყობინების გაგზავნა საჭირო არ არის.

„სხვებმა თქვეს, რომ წესი დაირღვა, მაგრამ ჯვარედინი დაკითხვის დროს ვერ დაასახელეს კონკრეტული ნორმატიული აქტი, სადაც ეს წესი გაწერილია,“ – დაამატა ადვოკატმა.

ამ თემაზე:

რა თქვა მოწმემ „სააკაშვილის ზღვიდან შემოპარვის საქმეზე“ – რეპორტაჟი სასამართლოდან

ნეტგაზეთის მასალების სხვა გამოცემებში გადაბეჭდვის წესი
ავტორი