დღეს, 26 აპრილს გამართულ საკოორდინაციო საბჭოს ბრიფინგზე, საქართველოს ჯანდაცვის მინისტრის მოადგილემ თამარ გაბუნიამ განაცხადა, რომ ინფექციის მატებასთან ერთად იზრდება მობილიზაციის ხარისხი ჯანდაცვის სექტორში.
„დღეის მდგომარეობით 3700-მდე პაციენტი რჩება ჰოსპიტლებში.
მიდის მუშაობა დამატებითი კლინიკების მობილიზებაზე. გეგმა გვაქვს – 10 მაისამდე 6000 საწოლის მობილიზება. დღევანდელი მდგომარეობით აქტიური შემთხვევები დაახლოებით არის 14 000-მდე.
გასული, მეორე ტალღის პერიოდში, როდესაც აქტიური შემთხვევები იყო 31 000-მდე, ეს იყო მაქსიმუმი, პიკური მაჩვენებელი. ამ პერიოდში საწოლფონდის დატვირთვა შეადგენდა საშუალოდ 6700 პაციენტს. აქედან გამომდინარე, მაქსიმალური დატვირთვის პირობებში, დაახლოებით 7500 საწოლის მობილიზება სჭირდება ჰოსპიტალურ სექტორს, თუმცა დღევანდელ მდგომარეობაში ის საწოლფონდი რაც გვაქვს, არის სრულად საკმარისი. მეტი დატვირთვაა თბილისზე,” – განაცხადა თამარ გაბუნიამ.
