დღეს, 4 აპრილს, სასამართლომ გაათავისუფლა გუშინ, გვიან ღამით „სირცხვილიას“ ოფისში დაკავებული აქტივისტები, მათ შორის გენრი დოლიძე.
გუშინ, 3 აპრილს, კომენდანტის საათის გაუქმების მოთხოვნით გაიმართა აქცია ბათუმსა და თბილისში. სწორედ ამ აქციის დროს სამი აქტივისტი დააკავეს.
გენრი დოლიძე ამბობს, რომ სასამართლო სხდომაზე პოლიციელების ჩვენებები ურთიერთგამომრიცხავი და აბსურდული იყო.
„ხვალ გაგრძელდება პოლიციელების დაკითხვა. ვინც გამოაგზავნეს, ის პოლიციელი საერთოდ ადგილზე არ იყო და ვერც ხვდებოდა მე შიგნით დამაკავეს თუ გარეთ. მაგ ეტაპზე შენობაში არ ვყოფილვარ, მოვყევი ჩემს მეუღლეს, რომელიც აშუქებდა როგორც ჟურნალისტი ამ აქციას,“ – ამბობს გენრი დოლიძე.
მისივე თქმით, მან დაკავებისას დაზიანებები მიიღო და სახელმწიფო ინსპექტორის სამსახურს უკვე მიმართა:
„სისხლნაჟღენთები მაქვს მრავლობითი და ნაკაწრები. წინასწარი დაკავების საკანში მოვიდა სასწრაფო დახმარების სამსახური, შედგა დათვალიერების აქტი. ახლა ჩამოდის სახელმწიფო ინსპექტორის სამსახური და უკვე მათთან მექნება კომუნიკაცია“.
გენრი დოლიძეს ადმინისტრაციულ სამართალდარღვევათა კოდექსის 166-ე და 173-ე მუხლების დარღვევას ედავებიან – წვრილმანი ხულიგნობა და პოლიციელისადმი დაუმორჩილებლობა:
„ეს მაშინ როცა, არის ლაივები… ჩემს მეუღლეს ჰქონდა ლაივი ფეისბუქზე მედიაპლატფორმიდან, თმებით ითრია პოლიციელმა, ძირს დააგდო და ტელეფონი გაუტეხა, რომ ლაივი შეეწყვიტა, რადგან მართლა არაადამიანურად ექცეოდნენ ირაკლი კუკანიას.
ამ ფაქტზე მოვახდინე მე რეაგირება და მოვითხოვე ბოდიშის მოხდა და ხმა როგორც კი ამოვიღე, ვინ მაცალა პრეტენზიების გაცხადება, ეგრევე დამაკავეს და უკან ხელებგადაგრეხილს წინ მიმიძღოდა მთელი ჯგუფი და ცემა-ცემით ჩამსვეს მანქანაში,“ – ამბობს გენრი დოლიძე.
ბათუმში აქტივისტები, რომლებიც მოძრაობა „სირცხვილიას“ ოფისში კომენდანტის საათს აპროტესტებდნენ, 4 აპრილს, გამთენიისას დააკავეს. სულ დაკავებული იყო სამი ადამიანი: გენრი დოლიძე, მუსიკოსი გიგა ნაკაშიძე და „გირჩის“ წარმომადგენელი ირაკლი კუკანია, რომელიც მალევე გაათავისუფლეს ხელწერილით.
ირაკლი კუკანია ამბობს, რომ დაკავებისას მას ფეხები ურტყეს და დაზიანებები აღენიშნება.
