„არა ძველი ბულვარის დამახინჯებას“ – ამ სლოგანით აქცია ბათუმში ხვალ, 25 დეკემბერს, 13 საათზე, სასტუმრო „ინტურისტის“ მიმდებარე ტერიტორიაზე იგეგმება. აქციის შესახებ ინფორმაცია „ფეისბუქზე“ ვრცელდება.
„აქციის მიზანია ხელი შეუშალოთ ძველი ბულვარის დამახინჯებას და უგემოვნო რეკონსტრუქციას“ – აღნიშნულია ღონისძიების აღწერაში.
აჭარის მთავრობა რომ ძველი ბულვარის რეკონსტრუქციას აპირებს, ამის შესახებ ერთი კვირის წინ გახდა ცნობილი. ძველი ბულვარის რეკონსტრუქციის აუცილებლობას აჭარის ფინანსთა და ეკონომიკის სამინისტროსა და აჭარის კულტურული მემკვიდრეობის სააგენტოში იმით ხსნიან, რომ ბულვარი განახლებას საჭიროებს და ახალი კონცეფციით ძველ ბულვარს მეტი გამწვანება დაემატება, ძველი კაფე-ბარები აღებული იქნება და მათ ახალი კაფეები ჩაანაცვლებს, რომლებიც ბულვარში, სავალი ბილიკის გაუქმებით გამოთავისუფლებულ, გამწვანებულ ადგილებში განთავსდება.
ძველი ბულვარის რეკოსტრუქციის იდეას მალევე გამოუჩნდნენ მოწინააღმდეგეები. არასამთავრობო ორგანიზაციების უმრავლესობის, კულტურული მემკვიდრეობის დამცველებისა და ბულვარში მდებარე კაფე-ბარების მფლობელების ინტერესები ამ შემთხვევაში ძირითადად ერთმანეთს ემთხვევა. ძველმა ბულვარი უნდა მოწესრიგდეს, მაგრამ იერსახე არ უნდა შეიცვალოს, წინააღმდეგ შემთხვევაში კულტურული მემკვიდრეობის ძეგლი აღარ იქნება – ასეთია მათი პოზიცია.
