ბათუმში შრომის ინსპექციამ 13 ობიექტი დააჯარიმა. ამის შესახებ ინფორმაციას აჭარის ჯანდაცვის სამინისტრო ავრცელებს.
ჯანდაცვის სამინისტროს ინფორმაციით, შრომის ინსპექციის, სურსათის ეროვნული სააგენტოსა და მუნიციპალიტეტის წარმომადგენლებმა ბათუმში კვების, საცალო და საბითუმო ვაჭრობის ობიექტები, სუპერმარკეტები და სასტუმროები 10 სექტემბერს შეამოწმეს.
რვა შემოწმებული სასტუმროდან პირობები ვერ დააკმაყოფილა ორმა სასტუმრომ. ესენია:
- სტამბული
- გალოგრე
შემოწმდა 8 საცალო და საბითუმო ვაჭრობის ობიექტი, რომელთაგან მოთხოვნები მხოლოდ ერთმა დააკმაყოფილა. მოთხოვნები ვერ დააკმაყოფილა 7-მა. აღნიშნული ობიექტები 10-10 ათასი ლარით დააჯარიმეს. ეს ობიექტებია:
- ვილმარტი
- სპარი
- ნიკორა
- ორი ნაბიჯი
- იალჩინ მარკეტი
- მაგნიტი
- კარფური
ამავე წყაროს ინფორმაციით, არსებული რეგულაციების გაუთვალისწინებლობისთვის დაჯარიმდა 3 სარიტუალო დარბაზის მფლობელიც, საქმიანობა კი 17-მა სარიტუალო დარბაზმა შეაჩერა.
„მათზე პოლიციის დეპარტამენტის თანამშრომლების მხრიდან კონტროლი ხორციელდება. გაფრთხილების შემდგომ შემოწმდა 28 კვების ობიექტი (რესტორანი), რომლებსაც ჯანდაცვის მინისტრის ბრძანებით განსაზღვრული რეკომენდაციები სრულად ჰქონდათ გათვალისწინებული“, – აცხადებს ჯანდაცვის სამინისტრო.
