თურქეთში საქართველოს ელჩი გიორგი ჯანჯღავა წერს, რომ სავარაუდოდ, ივნისის თვის მეორე ნახევრიდან თურქეთის ავიახაზები საქართველოს მიმართულებით ფრენებს განაახლებს.
ამის შესახებ ინფორმაციას საინფორმაციო სააგენტო Anadolu Agency-ც ავრცელებს. სააგენტო თურქეთის ავიახაზებზე დაყრდნობით წერს, რომ კომპანია მსოფლიოს 19 ქვეყანაში ფრენების განახლებას აპირებს, მათ შორისაა საქართველოც.
სააგენტო წერს, რომ Turkish Airlines-მა შეიმუშავა ფრენის გეგმა ივნისში, ივლისსა და აგვისტოში 19 ქვეყნის მიმართულებით. მათ შორისაა: კანადა, ყაზახეთი, ავღანეთი, იაპონია, ჩინეთი, სამხრეთ კორეა, სინგაპური, დანია, შვედეთი, გერმანია, ნორვეგია, ავსტრია, ნიდერლანდები, ბელგია, ბელორუსია, ისრაელი, ქუვეითი, საქართველო და ლიბანი და ამ მიმართულებებით ყოველ კვირაში 75 რეისი შესრულდება.
ამავე წყაროს ცნობით, საერთაშორისო მარშრუტებზე ფრენის სიხშირე ეტაპობრივად გაიზრდება.
თურქეთის ავიახაზებს როგორც შიდა, ასევე საერთაშორისო ფრენების შეჩერება COVID-19 პანდემიის გამო 28 მაისამდე ჰქონდა დაანონსებული. საქართველოში საგანგებო მდგომარეობა კი 22 მაისის ჩათვლითაა გამოცხადებული.
მთავარი ფოტო: Turkish Airlines/ვებგვერდიდან
