დღეს, 20 აპრილს, თურქეთის პრეზიდენტმა რეჯებ ტაიპ ერდოღანმა 23 აპრილიდან თურქეთის 31 ქალაქში ოთხდღიანი კარანტინი გამოაცხადა ახალი კორონავირუსის პრევენციის მიზნით.
ეს ქალაქებია: ადანა, ანკარა, ანტალია, აიდინი, ბალიქესირი, ბურსა, დენიზლი, დიარბაქირი, ერზერუმი, ესქიშეჰირი, გაზიანთეფი, ჰათაი, სტამბოლი, იზმირი, ქაჰრამანმარაში, კაისერი, ქოჯაელი, კონია, მალათია, მანისა, მარდინი, მერსინი, მუღლა, ორდუ, საქარია, სამსუნი, შანლიურფა, თექირდაღი, ტრაპიზონი, ვანი და ზონგულდაქი.
კარანტინის დროს მოქალაქეებს ეკრძალებათ ქუჩაში გასვლა.
ერდოღანის განცხადებით, ამჯერად კარანტინი უფრო ხანგძლივი იქნება მოახლოებული ეროვნული დღესასწაულის გამო, რომელიც თურქეთში 23 აპრილს აღინიშნება და დასძინა, რომ კარანტინი დასვენების დღეებში, შესაძლოა, რაღაც დროით გახანგძლივდეს.
თურქეთში Covid-19-ით ინფიცირებულთა დადასტურებულმა რიცხვმა 86 306-ს მიაღწია. ამგვარად, თურქეთი აზიაში პირველ პოზიციას იკავებს ინფიცირებულთა რაოდენობით. ბოლო მონაცემების თანახმად, 11 976-ს შეადგენს იმ ადამიანთა რიცხვი, რომლებიც გამოჯანმრთელდნენ და კლინიკები დატოვეს, 1 922 პირი კი ინტენსიური თერაპიის განყოფილებებში რჩება. გარდაიცვალა 2017 ადამიანი.
_____________
ფოტო: ევროპის პრესსააგენტო EPA-EFE/TOLGA BOZOGLU
