აჭარის ჯანდაცვის მინისტრის, ზაალ მიქელაძის ინფორმაციით, დღეს, 27 მარტს, ბათუმში კორონავირუსი კიდევ ერთ პირს დაუდასტურდა. ინფიცირებულ ადამიანს ევროპაში მოგზაურობის ისტორია აქვს. ის საქართველოში შემოსვლამდე 7 დღე იმყოფებოდა ესპანეთსა და გერმანიაში და კარანტინში იყო.
როგორც მინისტრი ამბობს, როცა პაციენტს დაუფიქსირდა ტემპერატურა 37.4c გრადუსი, ის მაშინვე იქნა გადაყვანილი კარანტინიდან ბათუმის ინფექციურ საავადმყოფოში.
ბოლო 24 საათის განმავლობაში საკარანტინო ზონიდან ინფექტიურ საავადმყოფოში სულ გადაყვანილი იყო 12 მოქალაქე და აქედან მხოლოდ ერთს დაუდასტურდა კორონავირუსი.
ბათუმში ამ დროისთვის სულ 7 პაციენტი მკურნალობს კორონავირუსზე.
„7 პაციენტიდან 6-ის მდგომარეობა შეესაბამება მსუბუქ მიმდინარეობას, მინიმალური კლინიკური ნიშნებით, ერთი პაციენტის მდგომარეობა საშუალო სიმძიმისაა, რადგან მას აქვს მთელი რიგი თანმხლები დაავადებები, თუმცა ამ ეტაპზე, პაციენტი არ არის მართვით სუნთქვაზე,“ – ამბობს ზაალ მიქელაძე, აჭარის ჯანდაცვის მინისტრი.
