საინფორმაციო და საკომუნიკაციო ტექნოლოგიების (ICT) სფეროში 3 ათას სპეციალისტს გადაამზადებენ. პროგრამაზე 7 მილიონი ლარი დაიხარჯება და ის მსოფლიო ბანკის ხელშეწყობით ხორციელდება.
როგორც „ბათუმელებთან“ მსოფლიო ბანკის პროექტის კომუნიკაციის მენეჯერი, დიანა ჯუმუხაშვილი ამბობს, პროგრამაში მონაწილეობის კრიტერიუმები ჯერ შემუშავებული არ არის, ამ ეტაპზე მხოლოდ იმ კომპანიების შერჩევაზეა ტენდერი გამოცხადებული, რომლებიც ტექნოლოგიების სფეროს სპეციალისტებს გადაამზადებენ.
„დღეს გამოცხადდა საერთაშორისო ტენდერი კომპანიების შერჩევაზე. პროგრამაში მონაწილე სპეციალისტების შერჩევა კი ოქტომბერში დაიწყება, როცა ცნობილი იქნება კრიტერიუმები.
ბუნებრივია, საინფორმაციო და საკომუნიკაციო ტექნოლოგიების სფეროში გარკვეული დონე უნდა ჰქონდეთ მსურველებს, ესენი შეიძლება იყვნენ როგორც დასაქმებული პირები, ასევე ისინიც, ვინც შეიძლება სტაბილურად არ არის დასაქმებული, მაგრამ სურს გადამზადება,“ – ამბობს დიანა ჯუმუხაშვილი.
კომუნიკაციის მენეჯერის თქმით, პროგრამის მიზანია, ქვეყანას ჰყავდეს მაღალი კვალიფიკაციის სპეციალისტები ამ სფეროში, რაც ხელს შეუწყობს საერთაშორისო დაკვეთების მიღებას.
„რაც უფრო კარგი სპეციალისტები ეყოლება ქვეყანას, ეს წაადგება როგორც ქვეყნის ეკონომიკას, ასევე ცალკეული პირების პროფესიულ განვითარებას და დასაქმებას საერთაშორისო დონეზე“.
პროექტი ხორციელდება მსოფლიო ბანკის სესხის ფარგლებში.
