2018 წელს საქართველოში გაცემული მშენებლობის ნებართვების 72,6 პროცენტი მოდის ქვეყნის სამ რეგიონზე. კერძოდ, ჩასატარებელი სამშენებლო სამუშაობის 48,3 პროცენტი – ქალაქ თბილისზე, 13,6 პროცენტი – აჭარაზე და 10,7 პროცენტი – ქვემო ქართლის რეგიონზე. გაცემულ ნებართვებში შედარებით დიდი წილით წარმოდგენილია მრავალფუნქციური საცხოვრებელი კომპლექსები. ინფორმაციას სტატისტიკის ეროვნული სამსახური ავრცელებს.
ოფიციალური დეკლარირებული მონაცემებით, საქართველოში 2018 წელს გაცემულია სულ 10204 ნებართვა [წინა წელთან შედარებით 2,8 პროცენტით ნაკლები] 6206 ათასი კვ.მ ფართობის შენობა-ნაგებობების მშენებლობაზე [წინა წელთან შედარებით 4,4 პროცენტით ნაკლები].
საქსტატის მონაცემებით, 2018 წელს ნებართვები გაიცა მრავალფუნქციური საცხოვრებელი კომპლექსების, სასტუმროების, სავაჭრო ობიექტების, სამრეწველო საწარმოების, სასოფლო-სამეურნეო დანიშნულების ობიექტებისა და სხვა შენობა-ნაგებობების მშენებლობაზე.
რაც შეეხება 2018 წელს დამთავრებულ მშენებლობებს, ნახევარზე მეტი მოდის ქვეყნის შემდეგ სამ რეგიონზე ; 29,6 პროცენტი ქალაქ თბილისზე, 15,3 პროცენტი – კახეთის რეგიონზე, ხოლო 11,2 პროცენტი – ქვემო ქართლის რეგიონზე.
სულ, 2018 წელს ექსპლუატაციაში მიღებულ იქნა 2091,9 ათასი კვ.მ ფართობის [წინა წელთან შედარებით 4,8 პროცენტით ნაკლები] 2518 ობიექტი [წინა წელთან შედარებით13,8 პროცენტით ნაკლები].
მშენებლობის ნებართვების სტატისტიკა 2018 წელს / წყარო: საქსტატი
