ბათუმში, გრიბოედოვის ქუჩის მოსახლეობა ამერიკულ თეთრ პეპელას ებრძვის. “ბათუმელებს” ფოტოები ამ ქუჩის ერთ-ერთმა მცხოვრებმა მოაწოდა და დახმარება გვთხოვა. მოქალაქის თქმით, ქუჩაში ხეები, ასევე ეზოები ამერიკული თეთრი პეპლითაა დაფარული.
ამაერიკული თეთრი პეპელა საკარანტინო მავნებელთა ნუსხაშია შეყვანილი – აზიანებს მოსავალს და ხეებს. მასთან ბრძოლა სურსათის უვნებლობის სამსახურს ევალება. სურსათის ეროვნული სააგენტოს აჭარის ფილიალის უფროსი ილია სირაბიძე ამბობს რომ დღეისათვის ამერიკული თეთრი პეპელა ბათუმში, რამდენიმე ადგილზეა დაფიქსირებული.
“ზარი შემოვიდა გრიბოედოვის ქუჩიდან და ხვალ გავალთ და ადგილზე ვნახავთ,” – ამბობს ილია სირაბიძე.
მისივე თქმით “ჯერჯერობით არანაირი ღონისძიება არაა დაგეგმილი ფაროსანას წინააღმდეგ ბრძოლის გარდა. თუ აღმოჩნდება რომ ამერიკული პეპელაა და არის საჭიროება მისი შეწამვლის, ასეთ შემთხვევაში შეიწამლება. მიმართული გვაქვს უკვე თბილისში და ალბათ გამოყოფენ მანქანას და შეიწამლება მხოლოდ ამერიკული პეპელა”.
