ხვალ, 14 ივნისს, ბათუმში საერთაშორისო კონფერენცია – „საქართველოს ევროპულ გზა“ იხსნება. კონფერენციაზე მისასალმებელი სიტყვით საქართველოს პრემიერ-მინისტრი გიორგი კვირიკაშვილი უნდა გამოსულიყო. იმის გამო, რომ კვირიკაშვილი დღეს, 13 ივნისს, პრემიერ-მინისტრის პოსტიდან გადადგა, კონფერენციაზე მისასალმებელი სიტყვით ის აღარ გამოვა.
პროგრამის მიხედვით საერთაშორისო კონფერენცია „საქართველოს ევროპული გზა“ ვიცე-პრემიერმა, საგარეო საქმეთა მინისტრმა მიხეილ ჯანელიძემ უნდა გახსნას. დაგეგმილია საქართველოს პრეზიდენტის გიორგი მარგველაშვილისა და პარლამენტის თავჯდომარის ირაკლი კობახიძის სიტყვით გამოსვლა.
საქართველოს მთავრობიდან კონფერენციაზე იუსტიციის მინისტრის თეა წულუკიანის, თავდაცვის მინისტრის ლევან იზორიას და სახელმწიფო მინისტრის შერიგებისა და სამოქალაქო თანასწორობის საკითხებში ქეთევან ციხელაშვილის გამოსვლაა დაგეგმილი. როგორც „ბათუმელებს“ საგარეო საქმეთა სამინისტროში განუცხადეს ამ ეტაპზე კონფერენციის გეგმაში რაიმე ცვლილება არაა და ყოფილი მინისტრები მასში მონაწილეობას მიიღებენ.
საერთაშორისო კონფერენცია „საქართველოს ევროპული გზა“ 2007 წლიდან ყოველწლიურად იმართება. კონფერენცია მონაწილეებისთვის წარმოადგენს საუკეთესო პლატფორმას ერთად იმსჯელონ ევროპის, რეგიონისა და მსოფლიო მასშტაბით მიმდინარე გეოპოლიტიკური პროცესებზე, არსებულ გამოწვევებზე, მათი გადაჭრის გზებზე და განიხილონ აღნიშნულ პროცესებში საქართველოს და „აღმოსავლეთ პარტნიორობის“ წევრი ქვეყნების როლი.
გიორგი კვირიკაშვილის გადადგომის შემდეგ, პრეზიდენტის გიორგი მარგველაშვილის განკარგულებით, ახალი მთავრობის შექმნამდე, მთავრობის მოქმედ შემადგენლობას მოვალეობის შესრულება დაევალა.
„საქართველოს კონსტიტუციის 73-ე მუხლის პირველი პუნქტის „დ“ ქვეპუნქტისა და 80(1) მუხლის მე-3 პუნქტის შესაბამისად, საქართველოს მთავრობის იმავე შემადგენლობას დაეკისროს მოვალეობის შესრულება მთავრობის ახალი შემადგენლობის შექმნამდე,“ -წერია პრეზიდენტის განკარგულებაში.
