ბათუმის მერიის მიერ გამოცხადებული ტენდერი ხელმისაწვდომ საცხოვრისთან, ე.წ. „იაფი სახლის“ მშენებლობასთან დაკავშირებით, არ შედგა. ტენდერში მონაწილეობის მისაღებად სავარაუდოდ არც ერთი კომპანია არ დარეგისტრირდა – მერიას ე.წ. „ნატ ტენდერი“ ჰქონდა გამოცხადებული, რაც იმას ნიშნავს, რომ პროცესის საბოლოოდ დასრულებამდე სრული ინფორმაცია კონკურენტებსა და მათ მიერ დაფიქსირებულ ფასებზე არ გამოჩნდება. ამ დროისთვის ტენდერს უკვე მინიჭებული აქვს სტატუსი – „არ შედგა“, ხოლო შედეგებში მონაწილე კომპანიების ან დისკვალიფიკაციის შესახებ ინფორმაცია არ ფიქსირდება.
ბათუმში, ჯავახიშვილის #78ა-ში, სადაც ე.წ. „იაფი სახლი“ უნდა აშენებულიყო, მერიამ ორი ხუთსართულიანი საცხოვრებელი სახლის მშენებლობაზე ახალი ტენდერი 11 იანვარს გამოაცხადა. შესყიდვის ღირებულება 2 მილიონ 478 000 ლარი იყო. ტენდერის მიხედვით ჩანდა, რომ ამ თანხაში მერია ითხოვდა როგორც ორივე სახლის, ასევე ეზოს კეთილმოწყობას.
ბათუმის მერიის შესყიდვების სამსახურის ინფორმაციით, ჯავახიშვილის #78-ის მიმდებარედ არსებულ მიწის ნაკვეთში სამომავლოდ კიდევ ორი ხუთსართულიანი საცხოვრებელი სახლის მშენებლობაა გათვალისწინებული.
„იაფი სახლის“ ტენდერში გამარჯვებული კომპანია აქამდეც ჰყავდა ბათუმის მერიას, თუმცა „კონვენტ ჯორჯია“, რომელსაც „იაფი სახლი“ უნდა აეშენებინა, მერიასთან ხელშეკრულების გაფორმებიდან ცოტა ხანში გაუჩინარდა. მშენებლობის დაწყებამდე მერიამ კომპანიას ავანსის სახით, ხელშეკრულების გაფორმებისთანავე, 1 643 785 ლარი გადაურიცხა. მიუხედავად იმისა, რომ კომპანიამ ხელშეკრულების პირობები დაარღვია, მერია ამ თანხის დაბრუნებას ვერ ახერხებს.
