„სოფელ მახალაკიძეებში გზის პირას ვცხოვრობ. მძიმეწონიანი მანქანების ინტენსიურად მოძრაობის გამო, გზა მთლიანად გამოსულია მწყობრიდან. შარშან კომპანიის მანქანა გადავარდა გზიდან, მაგრამ მაინც არ გააკეთეს. სავალი ნაწილი დავიწროვებულია და სულ ცვივა ქვა და ღორღი. ახლახანს, ჩამოშლილი მიწის მასისგან დაიწყეს გზის გაწმენდა, მაგრამ მთელი ნაშალი მასა ჩემს საკუთრებაში გადმოყარეს. გამინადგურდა კიტრის, პომიდვრის და კარტოფილის ნარგავები“ – გვეუბნება ის.
გენადი მახარაძე ამბობს, რომ ვითარების შესასწავლად და ზარალის ანაზღაურების მიზნით, მან შპს „აჭარისწყალი ჯორჯიას“ წერილობით მიმართა, თუმცა კომპანიის წარმომადგენლებს რეაგირება არ მოუხდენიათ.
„არც გამგეობიდან მოსულა ვინმე. მე არ ვაპირებ იმ მიწის გატანას და სავარგულების გაწმენდას, მოვიდნენ და ნახონ რა ზარალი მომაყენეს. გარდა იმისა, რომ ღამით არ გვძინავს მანქანების ხმაურის გამო და არის მტვერიც. ახლა ეს ზარალიც დაგვემატა“-ამბობს გენადი მახარაძე.
„ბათუმელები“ კომპანია „აჭარსიწყალი ჯორჯიას“ წარმომადგენელს დაუკავშირდა. რამინ შავაძე, რომელიც კომპანიის მიწის ოფიცერია, ამბობს, რომ მსგავსი ტიპის საკითხებზე ხიჭაურში სპეციალური კომისია მუშაობს და გენადი მახარაძემ მას უნდა მიმართოს.
