მთავარი,სიახლეები

გიორგი ერმაკოვი: „არჩილ ხაბაძესთან დღემდე გადასარევი ურთიერთობა მაქვს“

03.04.2019 • 1866
გიორგი ერმაკოვი: „არჩილ ხაბაძესთან დღემდე გადასარევი ურთიერთობა მაქვს“

გავრცელებულ ფარულ ჩანაწერებში, რომელიც დღეს „ტვ პირველმა“ გამოაქვეყნა, აჭარის ყოფილი მთავრობის თავმჯდომარე, არჩილ ხაბაძე ბათუმში მის დაბალ რეიტინგს იმდროინდელ მერს, გიორგი ერმაკოვს უკავშირებს და ამბობს, რომ ის არ ემორჩილებოდა. არჩილ ხაბაძე ამ ფარულ ჩანაწერში საუბრობს მიზეზებზე, რის გამოც თანამდებობიდან გადადგა. უცნობი ხმა ამის საპასუხოდ ამბობს – „ერმაკოვს კიდე მილიონები აქვს გადარიცხული…“

ჩანაწერის მიხედვით, არჩილ ხაბაძეს ამის შესახებ ბიძინა ივანიშვილთანაც უსაუბრია. ჩანაწერი, რომლის ავთენტურობა დადასტურებული არ არის, არჩილ ხაბაძე ამბობს, რომ შეიძლება ამ ყველაფრის უკან მისი შემცვლელი ზურაბ პატარაძეც მდგარიყო [გულისხმობს აჭარის მთავრობის ასევე ყოფილ თავმჯდომარეს, ზურაბ პატარაძეს, რომელიც ამჟამად აზერბაიჯანში საქართველოს ელჩია].

„ბათუმელები“ დაუკავშირდა ბათუმის ყოფილ მერს, გიორგი ერმაკოვს და ჩანაწერის შესახებ ჰკითხა. მან გვითხრა, რომ ჩანაწერი ჯერ არ უნახავს: „ქალაქგარეთ ვიმყოფები და ინტერნეტი არ იჭერს“.

ბათუმის ყოფილი მერის თქმით, ერთად მუშაობის პერიოდში არჩილ ხაბაძესთან თანამშრომლობის პრობლემები არ ჰქონია. „კოლეგიალური ურთიერთობა მქონდა და დღემდე გადასარევი ურთიერთობა მაქვს“, – განაცხადა გიორგი ერმაკოვმა „ბათუმელებთან“ სატელეფონო საუბარში.

არჩილ ხაბაძის ფარული ჩანაწერები დღეს „ტვ პირველმა“ გაავრცელა.

თავად არჩილ ხაბაძე სატელეფონო ზარებს არ პასუხობს.

 

გადაბეჭდვის წესი


ასევე: