დღეს, 29 დეკემბერს, ბათუმის პორტში ბრიტანეთის სამეფო საზღვაო ძალების ჰიდროგრაფიული ხომალდი HMS ECHO შემოვიდა. დახვედრის ცერემონიალი მე-10 ნავმისადგომზე გაიმართა. ბრიტანული გემი ბათუმის პორტში პირველად იმყოფება.
სტუმრებს პორტში დახვდა აჭარის მთავრობის თავმჯდომარე თორნიკე რიჟვაძე. შესრულდა საქართველოსა და ბრიტანეთის სახელმწიფო ჰიმნები. ფოლკლორულმა ანსამბლმა ხალხური ცეკვები შეასრულა, ვაჟთა გუნდმა კი „მრავალჟამიერი“ იმღერა.
ბრიტანელ სტუმრებს ქართული ღვინო მიართვეს.
როგორც ბრიტანული მხარე აცხადებს, HMS ECHO-ს შავი ზღვის აკვატორიაში შემოსვლა დიდი ბრიტანეთის მიერ საერთაშორისო წყლებში თავისუფალი ნავიგაციის პრინციპების მხარდაჭერას უკავშირდება. „აღნიშნული ვიზიტით, დიდი ბრიტანეთი გამოხატავს შავი ზღვის უსაფრთხოების მტკიცე მხარდაჭერას“.
„ბათუმი ტრადიციულად მასპინძლობს ჩვენი სტრატეგიული პატრნიორების გემებს როგორც ევროკავშირის, ასევე, დიდი ბრიტანეთიდან და ეს კიდევ ერთხელ ხაზს უსვამს დინამიკურ და ღრმა ურთიერთობებს, რომელიც ჩვენ გვაქვს ევროპის ქვეყნებთან“-განაცხადა თორნიკე რიჟვაძემ.
გემი ძირითადად პატრულირებს შავი ზღვის აკვატორიაში და როგორც თორნიკე რიჟვაძემ განაცხადა, ეს არის გეგმიური ვიზიტი.