დაგროვებითი პენსიის შესახებ კანონით, საპენსიო შენატანების შეტანა 2019 წლის იანვრიდან დაიწყება. კანონმა დაგროვებით საპენსიო სქემაში ავტომატურად ჩართო ყველა დასაქმებული, თუმცა არის გამონაკლისიც – დასაქმებულს, რომელსაც 2018 წლის 6 აგვისტომდე შეუსრულდა 40 ან მეტი წელი და არ სურს იყოს სქემის მონაწილე, შეუძლია სქემაში ავტომატურად გაწევრიანებიდან 5 თვის ვადაში [მაგრამ არაუადრეს გაწევრიანებიდან 3 თვისა] წერილობით მიმართოს საპენსიო სააგენტოს და გავიდეს სქემიდან. თუ ამ ვადას დაარღვევს, დასაქმებული რჩება სქემის მონაწილედ.
ანუ, 2019 წლის იანვრიდან, ნებისმიერ დასაქმებულს, რომელსაც 2018 წლის 6 აგვისტომდე უკვე შეუსრულდა 40 ან მეტი წელი, მაგრამ არ სურს იყოს დაგროვებითი პენსიის სქემის მონაწილე, სქემის წევრობას პირველ სამ თვეში [იანვარი-თებერვალი-მარტი] კანონი ავალდებულებს. შესაბამისად, მას ხელფასიდან დააკლდება საპენსიო შენატანი, რომელსაც კანონის შესაბამისად დამსაქმებელი გადარიცხავს.
ასეთ დასაქმებულს შეუძლია მხოლოდ 2019 წლის პირველი აპრილიდან 31 მაისის ჩათვლით პერიოდში მიმართოს საპენსიო სააგენტოს სქემიდან გასვლაზე. პირველი ივნისიდან შემდეგ მას აღარ ექნება უფლება ასეთი განცხადებით მიმართოს სააგენტოს და ის ავტომატურად დარჩება სქემის მონაწილედ.
სქემაში მონაწილეობაზე უარის თქმის შემთხვევაში, „დამსაქმებლის მიერ დასაქმებულის სახელით მის საპენსიო ანგარიშზე განხორციელებული შენატანები შესაბამისი ხარჯების გამოკლებით დაიბეგრება საქართველოს კანონმდებლობის შესაბამისად და დაუბრუნდება დასაქმებულს საპენსიო სააგენტოს მიერ განსაზღვრული წესით“.
იმის გარკვევა, განსაზღვრულია თუ არა ასეთი წესი, საპენსიო სააგენტოში ვცადეთ, თუმცა სააგენტოს ვერ დავუკავშირდით.
2019 წლის იანვრიდან დასაქმებულის საპენსიო ანგარიშზე საპენსიო შენატანს განახორციელებს დამსაქმებელი ელექტრონული სისტემის მეშვეობით. შენატანის ოდენობა კი დასაქმებულზე გასაცემი დასაბეგრი ხელფასის 2 პროცენტი იქნება.
უფრო გასაგები რომ იყოს, მაგალითად, თუ დღეს დასაქმებული ხელფასს ხელზე იღებს 500 ლარს, გამოდის, რომ მისი ხელფასი [დასაბეგრი] არის 625 ლარი, საიდანაც 125 ლარი საშემოსავლო გადასახადის სახით ბიუჯეტში ირიცხება. საპენსიო სქემაში ჩართვის შემდეგ კი ეს დასაქმებული ხელზე აიღებს არა 500 ლარს, არამედ 490 ლარს, ვინაიდან მისი დასაბეგრი ხელფასიდან, რომელიც 625 ლარია, 2% ანუ 12,5 ლარი დაგროვებითი პენსიისთვის გადაირიცხება, ხოლო დარჩენილი 612,5 ლარი კი დაიბეგრება და საშემოსავლო გადასახადის სახით 122,5 ლარი ბიუჯეტში გადაირიცხება.
დაგროვებით საპენსიო სქემაში ჩართვა სქემიდან გამოსულ პირს ნებისმიერ დროს შეუძლია, გამოსვლა აღარ.
—————————
კანონის მიღებამდე არასამთავრობო ორგანიზაციებმა რეკომენდაციით მიმართეს პარლამენტს, არ მიეღო კანონი, სანამ რეგულირების გავლენის შეფასებაზე კვლევა არ ჩატარდებოდაა. ამ ორგანიზაციების განცხადებით, სამუშაო ძალის გაძვირებისა და უმუშევრობის წახალისების თავიდან აცილების მიზნით, საპენსიო შენატანის განხორციელება საშემოსავლო გადასახადის შემცირებით უნდა მომხდარიყო.
დაგროვებით საპენსიო სქემაში სავალდებულო წესით მონაწილეობს ყველა დასაქმებული [საქართველოს მოქალაქეები ან
საქართველოში მუდმივი ბინადრობის ნებართვის მქონე უცხო ქვეყნის მოქალაქეები ან მოქალაქეობის არმქონე პირები], რომელსაც კანონის ამოქმედების თარიღამდე [2018 წლის 6 აგვისტო], არ ქონდა შესრულებული 40 ან მეტი წელი. დასაქმებული გადაიხდის დასაბეგრი ხელფასის 2%-ს.
დამსაქმებელი ვალდებულია ასევე დასაქმებულის ინდივიდუალურ საპენსიო ანგარიშზე გადარიცხოს დასაქმებულის დასაბეგრი ხელფასის 2%.
2%-ს გადაიხდის სახელმწიფოც, დასაქმებულის დასაბეგრი ხელფასის იმ მოცულობაზე, რომელიც წლის განმავლობაში ჯამურად არ აღემატება 24 000 ლარს, ან 1%-ს, თუ მონაწილის მიერ ხელფასის სახით მიღებული თანხა 24 000 ლარიდან 60 000 ლარამდეა.
სახელმწიფო არ განახორციელებს საპენსიო შენატანს დასაქმებულის დასაბეგრი წლიური ხელფასის იმ მოცულობაზე, რომელიც აღემატება 60 000 ლარს.
